Cangas del Narcea, 20 d'abril de 2021. La Conceyalía de Cultura de Cangas presentóu güei pola mañena a las personas ganadoras del XX Concursu de Debuxu "Marcapáxinas", que s'organiza con motivu del Día del L.libru. Las personas premiadas fuenon Darío Rodríguez Martínez ya Ángela Rodríguez Francos. "El nivel fui muito bonu", explicóu'l conceyal de Cultura, José María Álvarez Carro, qu'animóu a maestras/os ya escolinas/os a siguir participando nas actividades propuestas pola súa conceyalía. 

Darío Rodríguez Martínez fui premiáu na primer categoría, destinada al alumnáu de 1^u, 2^u ya 3^u de Primaria, pol debuxu presentáu cono pseudónimu Chamérix ya ía estudiante de 3^u de Primaria de la escuela de L.lamera del CRA "Ríu Cibea". Pola súa parte, Ángela Rodríguez Francos, estudiante de 5^u de Primaria del CP "Maestro Casanova",  presentóu un debuxu cono pseudónimu "Aries" ya ganóu na categoría segunda, destinada al alumnáu de 4^u, 5^u ya 6^u de Primaria. Los debuxos ganadores van dase a conecer el día 28 d'abril, dientro de las actividades que'l Conceyu organiza en colaboración cona Librería Treito con motivu del Día del L.libru. El Conceyu vei imprimir mil exemplares que van repartise ente los 212 estudiantes participantes ya convertise no marcapáxinas oficial de la Biblioteca del Conceyu "Padre Alfonso de Carvallo".

DÍA DEL L.LIBRU
 

La Conceyalía de Cultura organizóu una programación intensa con motivu del Día del L.libru, que se vei celebrar ente'l 27 ya'l 30 d'abril cona presentación d'ocho l.libros. Na presentación, las autoras ya los autores van firmar exemplares nuna carpa instalada no parque de La Reguerala, ou van tar centralizadas tódalas actividades. La encargada de dar el pistoletazu de salida vei ser Paula Losa Pérez-Curiel, que, a partir de las 18 horas, vei presentar el l.libru El gusto de comer bien, nel que van poder alcontrase más de 90 recetas dulces ya saladas, saludables ya fáciles. A las 19 horas, vei ser el turnu de la periodista de La Nueva España, Ana Paz Paredes, que vei presentar el sou l.libru Asturadictos, una guía pa namorase d'Asturias ya que nos aveira a los requeixos más guapos de la nuesa comunidá autónoma.

El miércoles 28 la xornada vei tar dedicada a la xente menuda, vei ser el Día Infantil ya van presentase los cuentos La huella de Roma, de Pedro Villanueva, ya Marta y Brando. Magia traviesa, d'Elisa Vázquez, a partir de las 17 horas. A las 18:30 horas, Darío ya Ángela Rodríguez van recoyer el premiu del concursu de marcapáxinas, dotáu con un val de 60 euros pa l.libros ya material escolar. Amás, vei entregase'l premiu del concursu de cuentos infantil patrocináu pola Caja Rural. La persona ganadora d'esti certame últimu vei conecese no programa "La Brújula", d'Onda Cero, que vei emitise en directo dende'l Parque de La Reguerala.

El xueves 29, l'historiador Pelayo Fernández vei presentar la Guía artística de Cangas del Narcea. Palacios y casonas, que se publicóu hai un anu ya qu'inda nun fui presentada por culpa l'andancia. Esta guía ta editada pol Conceyu Cangas ya la Sociedá Canguesa d'Amantes del País "Tous pa tous", que quieren poner en valor los palacios ya casonas del conceyu. Esta obra vei ser continuación de la Guía artística de Cangas del Narcea. Iglesias, monasterios y capillas, editada en 2018. El turnu de la escritora María Teresa Álvarez vei chegar a las 19 horas, momentu nel que vei dar a conecer información sobre la súa novela Juana de Castilla, ou reivindica la historia verdadera de Juana la Loca.

El vienres 30 d'abril, el profesor Alfonso López Alfonso, vei presentar la súa novela Territorio distópico acompañáu del periodista ya presentador d'informativos de la TPA,  Cristóbal Ruitiña. A las 19 horas, l'encargáu de ciarrar esta sumana del l.libru vei ser Javier Esparza, que vei dar a conecer a las canguesas ya los cangueses el l.libru No te arrepientas, nel que da 35 razones pa poner en valor la historia d'España ya nun arrepentise de lo que pasóu.

"Ía una programación mui completa ya pa tódolos públicos", aseguróu Álvarez Carro, qu'incidíu na importancia de la lectura, especialmente ente la rapazada. "El que l.le muito ya anda muito, ve muito ya sabe muito", dixo parafraseando a Miguel de Cervantes. El conceyal aprovechóu la oportunidá p'agradecer la participación a tódolos escritores ya tamién a la Librería Treito, cona que trabayóu de la mano pa sacar alantre esta programación cultural.