El Conceyu Cangas na sesión de plenu del 3 del mes muertu del 2019 acordóu, ente outras cousas, aprobar el Censu Oficial de Caminos ya Fontes Públicas del conceyu Cangas-Lote 5-sección caminos, correspondiente al aria xeográfica de la zona suroeste (val.le de Rengos), que compriende las parroquias de La Riela, Cibuyu, Berguñu, Larna, Castanéu, Veiga de Rengos, Oubachu ya L.larón.

Toda esta información cartográfica d'orixe local vei ser reflectada a la ciudadanía canguesa al traviés del visor LocalGIS. D'esa manera, el Conceyu aveira a la súa población, al traviés de la cartografía, toda la información relevante sobre'l sou territoriu. Nesta linia d'actuación, enmárcase'l ¿Censu Oficial de Caminos ya Fontes Públicas¿, qu'entra en períodu d'información pública d'un mes (a cuntar a partir del día 18 de febreiru) pal sou Lote 5, que puede ser consultáu telemáticamente al traviés de la páxina web del Conceyu ya presencialmente na Oficina Técnica de la mesma entidá.

D'esta manera, el Conceyu Cangas, en consonancia conas corrientes tecnolóxicas imperantes a escala nacional ya autonómica, alcuéntrase inmersu nun procesu de modernización tecnolóxica al traviés de la implantación de los Sistemas d'Información Xeográfica. Todo esto, cono obxectivu de xeorreferenciar información que s'usa diariamente na Casa Conceyu ya afecta a tol ámbitu local.

Nos años últimos, féixose necesario cuntar con un inventariu de caminos ya fontes públicas por parte del Conceyu Cangas, cono obxectivu de garantizar de forma prioritaria la seguridá xurídica d'estos elementos (caminos ya fontes) d'usu públicu ya del Conceyu, polo que'l sou usu, aprovechamientu, conservación ya policía son competencia de la propia entidá local.

Amás, resulta mui atractivo tener una base de datos unida a una cartografía d'última xeneración que pueda suponer un antias ya un espuéis na forma de xestionar la información xeográfica del Conceyu en tolo relativo a caminos ya fontes, pudiéndose implementar nun futuru con elementos nuevos de tipu demográficu, turísticu ou d'alministración tributaria que faciliten una xestión territorial más organizada ya eficaz.

Hasta la fecha, aprobánonse definitivamente dientro del Censu Oficial de Caminos ya Fontes del conceyu Cangas un total de 385 caminos que representan 852 kilómetros de l.largu. Todos el.los tán dientro de los Lotes 1, 2, 3 ya 4 (Sierra-NE, Ribera del Narcea-N, Las Montañas-NO ya Cotu-O, respectivamente).