Durante esti mes d'outubre, el Conceyu de Cangas del Narcea eicha a andar esti serviciu, pretendiendo crear, al traviés d'él, una canal directa de comunicación d'incidencias no conceyu.

            Pa usalu, las personas usuarias conéctanse a la web de Play Store ou APP Store, en función de la tecnoloxía empleada no sou dispositivu móvil (Android/iOS), escóin l'APP "Línea verde" ya yá pueden empicipiar a usar el serviciu. El procedimientu yía rápidu ya cómodu.

            Pa comunicar una incidencia, basta con escoyer la tipoloxía, yá que, mediante xeolocalización, l'aplicación encárgase de detectar de forma automática las coordenadas exactas nas que s'asitia la mesma. Así a todo, las personas usuarias tamién pueden faelo manualmente se deciden dunviar l'avisu n'outru momentu ou dende un sitiu diferiente. Espuéis, puede axuntase foto de la incidencia con una descripción curtia. En dunviándola, la persona responsable vei recibir una notificación de la mesma. A partir d'esi momentu, empicipiarán los trámites pa dar solución a la incidencia detectada ya, cuando'l problema tea resueltu, la persona que diu parte  vei recibir una notificación no sou móvil.

            Tamién puede comunicase una incidencia al traviés de la web  www.lineaverdecangasnarcea.es. Desque tea rexistrada, la persona usuaria tamién puede poner en conocencia del Conceyu'l desperfectu detectáu.

            L'APP "Línea verde" cunta con outros servicios, por exemplu, el de consulta. Cualisquier particular ou empresa puede faer una consulta sobre normativa ambiental ou ordenanzas del conceyu por vía telefónica ou al traviés de la web ou l'APP. Nun plazu máximu de 24 horas dase respuesta a las dudas.

            "Anque yía una páxina con conteníu principalmente medioambiental, la ferramienta de notificación d'incidencias puede aplicase a outros ámbitos, tanto ambientales cumo urbanísticos. Cona implantación d'esti serviciu, pretendemos ofrecer a la ciudadanía ya a las empresas de Cangas del Narcea una canal de comunicación directa que nos permita cumplir con tolas normas básicas de bienestar social. Yía difícil chegar a tolos puntos, porque'l conceyu yía mui grande, por eso, encántanos la idea d'involucrar a la ciudadanía ya escuitar las súas propuestas de meyora d'una manera tan rápida ya eficaz. Gracias a esta ferramienta ya a la colaboración ciudadana, los servicios del Conceyu cuntan con información en tiempu rial de cualisquier incidencia" manifestanon Laura Álvarez ya Begoña Cueto, conceyalas d'Urbanismu ya Mediu Ambiente, respectivamente.

            "Línea verde" yía un serviciu de baldre dafeitu. La ciudadanía ya las empresas de la zona pueden beneficiase de las ventayas qu'ofrez ensin contraprestación económica dala.