Cangas del Narcea, 11 de febreiru de 2021. El Conceyu de Cangas feixo pública la convocatoria de trés contratos en prácticas con financiación del Fondu Social Européu. Trátase de trés puestos de trabayu de técnicu/a alministrativu/a, informador/a turísticu/a ya arquitectu/a técnicu/a ou xeógrafu/a, que dan opción a un contratu de trabayu durante un anu a menores de 30 anos. "Ía una manera de consiguir experiencia", manifestóu la primer teniente d'alcalde ya conceyala d'Obras, Urbanismu, Mediu Ambiente ya Fiestas, Laura Álvarez, que piensa que "estos puestos van reforzar los servicios ya meyorar l'atención a los vecinos ya las vecinas". Las bases pueden consultase na web del Conceyu ya las solicitudes han presentase no Rexistru Xeneral del Conceyu hasta'l 24 de febreiru.

Outramiente, el Consistoriu cangués publicóu l'anuncia del Plan d'Empléu 2020-2021 ya contempla la contratación de dous oficiales d'albañilería, dous peones d'albañilería, dous oficiales de xardinería ya un peón de xardinería. "Estos contratos van permitir a siete personas paradas de tiempu ou beneficiarias del salariu social trabayar un anu no conceyu", explicóu Álvarez, qu'especificóu que gracias a estas contrataciones van poder fadese trabayos diferientes relacionaos con cadagunu de los puestos a desenvolver. El plazu de solicitú acaba'l 24 de febreiru. 

• PLAN D'EMPLÉU 2020-2021 - Anuncia de la convocatoria ya Bases Reguladoras del Procesu Selectivu 10/02/2021
• CONTRATOS EN PRÁCTICAS 2020-2021 - Anuncia convocatoria ya Bases Reguladoras del Procesu Selectivu