Cangas del Narcea, 30 de marzu de 2021. La Conceyalía d'Obras de Cangas del Narcea actúa de manera urxente nas pistas de Cibuyu ya Santa Marina, ou esfananon los muros de contención por culpa los temporales últimos. "Fixemos una actuación rápida pa evitar que l'estropiciu fose mayor nos dous caminos", dixo la conceyala d'Obras, Urbanismu, Mediu Ambiente ya Fiestas de Cangas del Narcea, Laura Álvarez. La edil explicóu que se trata d'unas pistas mui usadas, al alcontrase cerca de las casas, "por eso contratemos los trabayos mediante un procesu d'emerxencia", especificóu Álvarez.
La zona afectada en Cibuyu, a la vera una casa, tien yá acabada la obra,que consistía n'arreglar el muru de seis metros qu'esfanóu ya outras partes de la pista que presentaban blandones.   En total, actuóuse sobre 17 m d'esti camín. Amás, sustituíuse un tramu de 13 metros de baranda que taba apoliada ya en mal estáu, porque suponía un peligru pa las personas que la transitaban. Esta obra, cuntóu con un presupuestu base de   19 348,30 euros, sigún recói la memoria descriptiva del proxectu.

El camín afectáu en Santa Marina esfanóu 4 metros ya presentaba deformaciones, roturas ya barrigas, lo que feixo necesaria una actuación en más de 22 metros. Un arreglu nel que se trabayóu de manera urxente pa evitar que'l dañu actual se multiplicara nas zonas que rayaban cono muru. El presupuestu de las obras, que tán executándose ya acabarán la sumana qu'entra previsiblemente, subíu a   37 530,77 euros.