Cangas del Narcea, 19 de marzu de 2021. El Conceyu de Cangas del Narcea, al traviés de la Conceyalía de Cultura, vei traer el próximu 2 d'abril al Teatru Toreno al grupu de jazz Aritza Castro Project. Trátase d'un cuartetu con un reportoriu propiu ya personal, nél, puede percibise la l.libertá d'expresión de cadagunu de los integrantes del grupu que conforman Juan Ortiz al pianu, Roberto Nieva al saxu altu, David Ruiz cono contrabaxu ya Aritza Castro conas baquetas de la batería.

El cuartetu d'Aritza Castro participóu en muitos festivales, por exemplu, el festival de jazz de Donostia, el de Getxo, ou'l BBK jazz live. Tamién tocanon en muitas salas ya teatros, la Bilbaina Jazz Club, el Café Central, el Bogui Jazz, el Teatru Lara, el Teatru Arriaga, el Palaciu Euskalduna... ya'l próximu 2 d'abril, a las 19:30 horas, no Teatru Toreno de Cangas. L'aforu ta limitáu ya las entradas han garrase antias na Casa de Cultura "Palaciu d'Oumaña", debiendo cumplise'l protocolu COVID establecíu. 

Exposición

La Casa la Cultura de Cangas vei acoyer ente'l 7 ya'l 16 d'abril la exposición "Bocetos de la mina y los mineros", del artista xixonés Luis Felipe Capellín. Trátase d'una muestra na que pueden vese 120 esbozos feitos con bolígrafu, lápiz de grafitu ya carboncillu. Las obras axúntanse de seis en seis, buscan suxerir ya tresladar la historia de la minería que n'Asturias pare tar acabándose ya convirtiéndose n'alcordanza. L'autor cunta con una traxectoria cultural, social ya política amplia, participa activamente en producciones de cine documental con más de 65 obras, escribiendo una columna nun diariu autonómicu dende hai 22 anos ya fadiendo debuxos con exposiciones de faros marinos, inmigrantes, el declive del procesu industrial ou la obra dedicada a la pandemia de la COVID-19. 

Outramiente, el l.lunes 22 de marzu inaugúrase la XIX Sumana Cultural de Cangas cono títulu "Cultura ya Arte en Cangas". Failo cona exposición conxunta de dous harmanos cangueses "Lugares comunes: Amaya y Federico Granell", que vei poder visitase hasta'l 5 d'abril na Sala d'Exposiciones. La presentación, na que van participar varias autoridades del Conceyu, vei cuntar cona participación de Federico ya la introducción de José Ramón Puerto. Durante toda la sumana, vei haber actividades, hasta'l sábadu 27 de marzu, momentu nel que van clausuráse las xornadas con un conciertu a cargu de la cantautora canguesa Tania Pereira.