El  1 de febreiru informamos de que'l l.libru El vino de Cangas, de Neto García del Castillo ya Carolina Pelaz Soto,fora escoyíu nas dúas categorías de los Gourmand World Cookbook Awards, cumo finalista español ente 215 países de todu'l mundu. 

A la final, el xuráu tomóu'l sou determín el 26 de mayu en Yantai (China) ya'l xuráu díu a El vino de Cangas el premiu segundu na categoría d'ilustraciones ya'l terceiru  na categoría meyor l.libru sobre vinu européu (menos Francia), ex aequo, nesti casu últimu, con Slovak Wine Guide, de Vladimir Hronský  (Slovart).

El l.libru, publicáu no 2017 por Velasco Ediciones cona colaboración del Conceyu de Cangas ya l'asesoramientu técnicu de la DOP Cangas, supón una aproximación didáctica a la cultura vitivinícola en xeneral ya a la de los vinos de Cangas en particular.
Pa el.lo, valse de las aventuras d'Alvarín, Mencía ya'l sou perru Cuetu que, al traviés d'un viaxe apasionante alredor de las viñas nel que los lectores van descubrir un paisaxe diferiente, van enseñanos tamién los tipos d'uva de la zona, cúmo se fai'l vinu, qué yá eso de la DOP ya los productos de calidá diferienciada...

Reacciones ya valoraciones al premiu

Neto García del Castillo, autor de las ilustraciones: «Pensar qu'un premiu con esta proxección ya valía considere esti l.libru cumo'l segundu meyor ilustráu del mundu resúltame algo chocante. Supongo que más que los debuxos valorarían el sou potencial didácticu ya la súa interacción conos textos. Una alegría igualmente. Préstame qu'esti l.libru pueda ayudar a difundir el conocimientu del vinu de Cangas no mundu».

Carolina Pelaz, autora de los textos: «Esti l.libru ta escritu dende'l cariñu por unas tierras ou los viticultores l.luitan contra la orografía ya'l mal tiempu pa, añalmente, danos los sous meyores vinos. Estos dous premios Gourmand dedíco-yslos a esas personas, deseando que contribuyan a dar a conecer el vinu de Cangas n'outros sitios».

Begoña Cueto, conceyala de Turismu ya Desenvolvimientu del Conceyu Cangas:  «El vinu de Cangas yía d'una calidá excepcional, eso ta claro, pero tamién lo yía, de la mesma manera, la cultura ya la tradición vitivinícola de la zona, que yá lo que Carolina ya Neto supienon plasmar nesti l.libru. Hai dous años apostamos por esti proxectu ya nun nos decepcionóu nada. Esti premiu yá un arguyu pa nós».

Beatriz Pérez, presidenta de la DOP Cangas: «Expresamos la nuesa satisfacción pol feitu de que'l l.libru fora recibíu con esti galardón doble, que, nun hai duda, vei ayudar a que se conoza más el vinu de Cangas fuera de las nuesas fronteras».

Cristian Velasco, editor de Velasco Ediciones: «Arguyosos de poner a disposición de los lectores un títulu que tien yá reconocencia internacional».