El l.libru El vino de Cangas yía finalista en dúas categorías de los Gourmand World Cookbook Awards: «Vinu Européu (ensin Francia)»  ya «Ilustración».
Los Gourmand World Cookbook Awards fonon fundaos por Edouard Cointreau en 1995 ya desde esa fecha recompensan cada añu los meyores l.libros de cocina ya vinu.
L'obxectivu de la convocatoria añal yá premiar las obras más sobresalientes no qu'a la difusión cuidada de conteníos de corte gastronómicu se refier.
La superación d'esta primer fase de corte en dúas categorías, «Vinu européu (ensin Francia)» ya «Ilustración», da a la obra de Neto García del Castillo ya Carolina Pelaz Soto la posibilidá de convertise nuna de las obras de referencia gastronómica a nivel internacional.
Neto García del Castillo ya Carolina Pelaz Soto son bonos conocedores de la cultura vitícola canguesa. El primeiru cunta con un currículum reconocíu ya premiáu cumo debuxante, ilustrador ya humorista gráficu ya la segunda atesoura una formación ya una experiencia no ámbitu museísticu amplia.
El l.libru que fixenon xuntos, pola súa parte, retrata lo meyor de la tradición vitivinícola canguesa, presentada cona mirada de dous nenos, Alvarín ya Mencía, que fairán, cono sou perru Cuetu, un recorríu polo más sobresaliente de la cultura canguesa asociada al vinu.
La edición, pola súa parte, foi promocida pola DOP Vinu de Cangas ya'l Conceyu de Cangas del Narcea ya deseñada por Velasco Ediciones.
En cuanto al conteníu, el  l.libru ta compuestu por 28 páxinas ilustradas en color ya cunta las aventuras d'Alvarín, Mencía ya'l sou perru Cuetu que, fadiendo un repasu entreteníu ya adaptable a rangos d'edá diferientes, darán a conocer ente los más pequenos tola información relevante sobre la cultura del vinu en Cangas.
 Esti galardón reconoz tanto la edición cumo'l conteníu  de la obra firmada por Pelaz Soto ya García del Castillo, refuerza'l papel de la propia institución promotora, el Conceyu Cangas, ya contribúi decisivamente a la difusión de la cultura vitivinícola canguesa no mundu.
Tódalas personas ya entes implicaos comparten la satisfacción, recalcando unos ou outros puntos:
L'editor de la obra, Cristian Velasco, di sintise satisfechu ya, nesti sentíu, reconoz el trabayu de los autores ya la implicación de las dúas instituciones comprometidas cona promoción de la cultura vitícola propia, la DOP Vinu deCangas ya'l Conceyu de Cangas del Narcea.
Carolina Pelaz Soto insiste na importancia de la inclusión d'esta obra nas dúas categorías de los premios, dao que supón una visibilización de la cultura canguesa ya de los sous productos fuera de las nuesas fronteras.
Pola súa parte, la conceyala de Turismu, Begoña Cueto, afirma que la nominación yá yía una muestra inequívoca tanto de la importancia ya l'interés que despierta'l vinu DOP Cangas, cumo del l.labor importantísimu feitu por Carolina, responsable del Muséu del Vinu durante años ya gran conocedora de la tradición vitivinícola canguesa, ya Neto, ilustrador cangués reputáu. Amás, destaca tamién la oportunidá que brinda la inclusión nas nominaciones a la hora de danos a conocer fuera del territoriu.  
Una cousa pare clara, namás la mención yá da la posibilidá de dar a conocer la obra ya'l productu na Gourmand Awards Ceremony, que se celebrará na ciudá de Yantai (China) los días 27 ya 28 de mayu.