Cangas del Narcea, 7 del mes muertu de 2020. L'alcalde de Cangas del Narcea, José Víctor Rodríguez, feixo una valoración mui positiva de la inversión recoyida no borrador del Proxectu de Presupuestos pal 2021. Nél, recóise una inversión en materia sanitaria de cuasi un millón d'euros, dando respuesta a una reivindicación histórica, l'ampliación del centru de salú de Cangas del Narcea, que na actualidá alcuéntrase nos baxos del Hespital Carmen ya Severo Ochoa ya que vei construise nuna finca a la vera del centru hespitalariu, "vei asitiase nun edificiu a la par del hespital, pero la obra nun vei tar acabada pa estiañu, porque fadela costa más de los 470 000 euros qu'establecen estos presupuestos, trátase namás d'una inversión pluriañal pa poner la base ya empicipiar en 2021 cona actualización, l'ampliación ya la meyora de los servicios", sigún explicóu'l rexidor.

Trátase d'una apuesta pola atención primaria con un proxectu yá redactáu que vei  permitir, "sacar el centru de salú del hespital", manifestóu Rodríguez, qu'apuntóu qu'esta obra vei permitir ampliar las consultas ya outros servicios médicos del propiu hespital. "Ganemos extensión con un edificiu a la par del actual ya, polo tanto, vamos poder reordenar ya organizar  los servicios médicos qu'agora mesmo tien esti hespital", apuntóu l'alcalde, que piensa qu'estos espacios van valir p'ampliar no futuru la cartera básica de servicios del hespital, que dende 1986 hasta güei siempre fui medrando. 

Tubongu

El Proxectu de Presupuestos del Principáu tamién recói una partida de 80 000 euros pa la reforma del consultoriu periféricu de Tubongu. La obra compriende la reforma integral del edificiu con una sala d'espera, una consulta d'enfermería, una consulta de medicina, un cuartu bañu adaptáu, una sala polivalente con cuartu bañu pal personal ya un almacén. "Ía una inversión importante porque meyora l'atención sanitaria na zona rural, amplía los espacios, renovando l'interior no qu'antias era la escuela, que l.lieva ciarrada dende 2015 ya, polo tanto, atiende tamién a una reivindicación histórica que tenía esti Conceyu ya las personas usuarias d'esta parte del conceyu",  recordóu l'alcalde, qu'apuntóu que la obra podería tar acabada pa la primavera. "En tiempos de COVID fader estas dúas inversiones del centru de salú ya'l consultoriu de Tubongu, que suman más de mediu millón d'euros, sigue siendo una apuesta pola atención primaria, qu'ía la primer vez que ¿¿uita contra'l COVID ya lu enfrenta".

Rodríguez tamién falóu de la inversión de 54 000 euros del Plan d'Accesibilidá en centros sanitarios del Aria II, amás de la inversión de 400 000 euros pa la reforma en materia d'eficiencia enerxética,  "vei permitir el cambiu de ventanas, calefacciones ya l.luminarias nos centros rurales del conceyu", lo qu'a xuiciu del rexidor, "son cambios necesarios,  pal mantenimientu ya conservación de los nuesos centros ya, tamién, pa la meyora de l'atención sanitaria ya las condiciones de trabayu nos centros rurales".