El primer destín ensin gluten d'España, Cangas del Narcea, rexistróu no que l.levamos de branu un 42% más de visitas de turistas que no 2017. Las personas que conforman esa subida desplázanse al occidente pa disfrutar de la súa gastronomía ensin gluten.  
Esti feitu fai que'l Conceyu de Cangas se proponga siguir trabayando nesta marca de calidá integrándose na app de restoranes ensin gluten Celicidad con una sección propia. Los 39 establecimientos cangueses que fonon asesoraos pola plataforma Celicidad pa ofrecer serviciu ensin gluten con seguridá tienen un espaciu destacáu na aplicación, lo que vei contribuir a da-y más visibilidá a esti proxectu precursor n'España al traviés d'una app que supera yá las 45.000 descargas.

"Dende que'l proxectu se presentóu en Fitur en xineiru de 2018, medróu abondo'l númaru de personas con celiaquía ou sensibles al gluten que nos visitan pa conocer tódalas opciones que podemos ofrecer ya disfrutar en Cangas del Narcea. Al traviés d'esta inclusión na app, van conocenos tovía más personas obligadas a vivir ensin gluten de manera estricta ya deseosas de disfrutar d'una gastronomía de primer nivel ensin tener que preocupase de la contaminación cruzada", apunta Begoña Cueto, conceyala de Turismu del Conceyu de Cangas del Narcea.  
La sección Cangas sin Gluten de l'app Celicidad apare na pantalla del principiu, polo que cada persona usuaria qu'usa l'aplicación vei conocer el proxectu, amás de cadagunu de los establecimientos que forman parte del mesmu: sitios ou agospiase, tiendas, cafeterías, restoranes, un obrador especializáu, una ganadería ecolóxica ya hasta una fábrica d'embutíos.  
"L'app superóu en xunu las 45.000 descargas ya no branu multiplicóuse l'usu, dao que cunta con más de 2.000 restoranes con opciones ensin gluten en todu'l país ya yá una ferramienta bien práctica pa disfrutar con seguridá nas vacaciones, descubriendo restoranes ya obradores nos que las personas con celiaquía pueden disfrutar ya comer con seguridá", explica'l director técnicu de l'app, Juan Luis Quirós.

Aumentu del turismu ensin gluten

Durante las fiestas de la Pascua, Cangas yá notóu un aumentu importante del turismu de personas qu'han quitar el gluten de la súa dieta. Dende la Xunta d'Hostelería de Cangas, dábase a conocer que'l 30% de los servicios ofrecíos foran ensin gluten.
En mayu, las III Xornadas Cangas ensin Gluten, qu'organiza'l Conceyu Cangas xunto con Celicidad, tamién chenanon restoranes ya actividades durante'l fin de sumana.
Ya, outra vez no branu, las cifras son importantes. "L'app Celicidad danos datos d'óu votan ya valoran las personas usuarias ya, en relación al 2017, hai un 42% más de valoraciones en Cangas del Narcea. Anque l'añu pasáu Cangas sin Gluten nun tenía sección propia, dalgunos establecimientos yá taban daos d'alta", comenta Quirós.  

Dende la Oficina de Turismu de Cangas del Narcea, confirman la tendencia: "Tenemos un númaru importante de consultas sumanales de personas de procedencia diferiente que vienen a Cangas atraíos pola súa gastronomía ensin gluten ya por tolo que tien qu'ofrecer el conceyu sobre los establecimientos de la rede Cangas sin Gluten", comentan.

El 18 d'agostu, no expositor de Cangas del Narcea de Fidma, tará l'obrador 100% ensin gluten Isacel.

Proxectu precursor n'España

La rede Cangas sin Gluten yá un proxectu precursor n'España ya convertíu a Cangas no primer destín ensin gluten del estáu. La rede cunta con establecimientos rurales ou agospiase, restoranes, tiendas d'alimentación, carnicerías, farmacias, l'obrador especializáu Isacel, la ganadería ecolóxica Casa'l Cuartu ya la fábrica d'embutíos Santulaya. Todos fonon asesoraos por Celicidad pa poder ofrecer un serviciu seguru ou información a las personas con celiaquía.  Los 39 establecimientos cuntan con un distintivu que los identifica ya tán recoyíos tamién na web cangassingluten.com.

Sobre Cangas sin Gluten

El Conceyu de Cangas del Narcea presentóu en xineiru en Fitur el proxectu Cangas sin Gluten,  convirtiéndose no primer destín ensin gluten d'España ya sumando 39 establecimientos adheríos formaos en celiaquía ya dieta ensin gluten, dende establecimientos rurales onde agospiase a restoranes, pasando por carnicerías ya farmacias. El conceyu Cangas cunta con un númaru grande de personas con esta enfermedá ya, por eso, convertíuse nos tiempos últimos en todu un referente pa las personas que necesitan vivir ensin gluten, lo que fai que'l conceyu yá sea conocíu en todu'l país cumo'l paraísu de las personas con celiaquía. 

Sobre Celicidad

Celicidad yá un entornu dixital especializáu en celiaquía, dieta ensin gluten ya restauración ensin gluten, organizadores de las Xornadas Cangas sin Gluten. Cuntan con una web ya una app de restoranes ensin gluten ya, en cuasi trés años de traxectoria, recibienon muitos galardones pol sou l.labor cumo divulgadores de la celiaquía ya la dieta ensin gluten.

 
Más información en:
www.cangassingluten.com