La Sumana de Música na Basílica, que se vei celebrar ente'l 2 ya'l 7 del mes muertu ya ta organizada pola Conceyalía de Cultura de Cangas del Narcea, consolídase cona celebración d'una edición tercera onde las voces más nuevas van ser las protagonistas. 

 

Los 4 primeiros días dedicaránse a la producción asturiana. El l.lunes, abrirá las xornadas el Cuarteto Appassionato cona soprano Vanessa del Riego. Esta actuación primera yá particularmente interesante porque dous de los componentes del grupu son precisamente personas vinculadas a la Escuela de Música de Cangas, onde impartienon ou imparten clases, lo que da cuenta de la súa calidá cumo profesionales. Siguiendo al grupu debutante, apare n'escena'l martes Ensemble Vocal in Paradisum, grupu que yá actuóu en Cangas durante la celebración del centenariu de San Tisu ya qu'agora repite ofreciendo un conciertu nun entornu diferiente ya con una acústica más propicia pal disfrute plenu de las súas voces. El miércoles, pola súa parte, la Coral Polifónica de Cangas del Narcea, dirixida por Cristina Casielles, ofrecerá una misa cantada de Santa Bárbara cola súa maestría avezada. Esta actividá variará l'horariu, al tener qu'adaptase al de la liturxa, ya fairáse a las 19:00 horas, envede a las 20:30 horas cumo'l restu de conciertos. El xueves, cerrará las intervenciones asturianas el Joven Coro de la Fundación Princesa de Asturias, dirixíu por José Ángel Émbil. El vienres, será'l turnu d'una de las apuestas más atractivas ya tresgresoras, Goizargi Gospel Choir, coru vascu dirixíu pol reconecíu Ramón Escalé ya, p'acabar esta sumana musical, el Coro Joven de la Sinfónica de Galicia, dirixíu por Daniel G. Artés, ofrecerá  una actuación que mezclará ya adaptará ritmos diferientes nas interpretaciones d'estas rapazas ya rapaces. 

El conceyal de Cultura, José María Álvarez Carro, insistíu na importancia d'estas xornadas dientro de la programación cultural canguesa, rica ya variada, ya recalcóu la importancia de l'asistencia de tantos coros de mozos ya mozas explicando la necesidá de dotar d'espaciu ya protagonismu al relevu xeneracional necesariu del xéneru ya, tamién, d'ofrecer una ufierta variada ya sensible a la edá que pueda atraer a públicu más nuevu hacia formas de música que tán fuera de los formatos normales de consumu.