Cangas del Narcea, 7 d'agostu de 2020. L'alcalde Cangas, José Víctor Rodríguez, anuncióu güei que'l Conceyu Cangas vei poder emplear más de 700.000 euros del superávit pa  fader inversiones no conceyu.  Rodríguez afeóu a los populares que votaran en contra de desbloquear una situación que permite a los Conceyos gastar el 50 % de los sous aforros na Xunta Directiva de la Federación Española de Municipios ya Provincias (FEMP). <<Hasta agora nun lo podíamos fader pol bloquéu de la "Lei Montoro", qu'impulsóu'l gobiernu de Rajoy>>, recordóu'l rexidor. Por esti motivu, los conceyales de PSOE ya IU votanon en contra de la moción presentada pol PP: <<chega tarde, l'alcuerdu ente la FEMP ya'l Ministeriu de Facienda yá ta tomáu>>. El Conceyu Cangas vei acceder, amás, al fondu de 5.000 millones d'euros que puxo a la súa disposición el Ministeriu de Facienda.

La corporación aprobóu por unanimidá los seis proxectos que van poder financiase dende los fondos europeos LEADER, que cuntan con un presupuestu de 331.200,53 euros ya que <<van permitir meyorar la vida del vecindariu, xenerar empléu ya atraer turismu>>. Ente los proxectos aprobaos, ta la renovación de los xuegos infantiles del parque d'El Mineru, acabar la obra de los vestuarios del campu de fútbol, comprar un vehículu pal serviciu d'Obras, siñalizar la ruta de la Vuelta Ciclista a España ya'l Camín Real de Brañas/Leitariegos ya condicionar la ruta de Las Viñas.

La corporación aprobóu por unanimidá una moción pa instar al Principáu a arreglar la carretera de Bisuyu, <<ta en mui mal estáu ya hai qu'arreglala>>, dixo l'alcalde. El plenu tamién sacóu alantre'l Plan de Drogas 2020, el procesu selectivu pal ingresu na Policía del Conceyu ya'l censu de fontes ya caminos del val.le de Rengos. Tamién s'aprobóu la representación n'órganos colexaos de la edil Ada Riesco, que vei mantener la mesma representación que tenía hasta la fecha'l sou antecesor, Aurelio Linde. Durante'l plenu díuse cuenta de la renuncia del conceyal del PP Antonio Rodríguez,  <<por motivos personales>>, un puntu que s'incluíu nel orde del día a petición de los propios populares, a fin de nun retrasar la incorporación d'un representante nuevu.