Cangas del Narcea, 29 de los santos de 2020. La conceyala de Desenvolvimientu del Conceyu de Cangas del Narcea, Begoña Cueto Blanco, quixo salir al pasu de las declaraciones feitas esti fin de sumana pola diputada del PP, Cristina Vega, qu'esixía acabar conos problemas de telecomunicaciones no conceyu. "Chegan meses tarde", explicóu la edil, que destacóu que la empresa Redes ta instalando la fibra óptica na vil.la de Cangas, "pare que tódolos vecinos se dan cuenta de que se tán fadiendo los trabayos menos el PP, que quier colgase medallas que nun-y correspuenden", dixo recordando que la empesa Orange vei invertir 655 000 euros pa conectar 3 900 casas ya negocios. 

Cueto Blanco explicóu amás el despliegue de fibra óptica na capital del conceyu: "instalóuse en Courias ya vei chegar tamién a l.lugares cumo Chanu, L.lumés ya La Riela". Los trabayos vei fadelos la empresa Adamo, cona intención de siguir desplegándose pol restu'l conceyu.  La conceyala tamién anuncióu qu'antias d'acabar l'añu "las empresas Orange ya Vodafone van instalar 5G en Mieldes ya Aciu, cubriendo tola zona de Sierra ya dando serviciu a La Riela ya El Cotu". La edil de Desenvolvimientu del Conceyu tamién falóu de las comunicaciones bonas qu'existen en tolas escuelas del conceyu ya garantizan una educación de calidá ya recordóu que conos  fondos mineiros vei instalase fibra óptica no polígonu de Tubongu, con una inversión de 300 000 euros, quedando cubiertas las dúas zonas industriales del conceyu.

Cueto Blanco tamién reconecíu qu'a veces hai problemas de recepción cona siñal de la televisión, "dende l'equipu de gobiernu tamos trabayando pa solucionalo", recalcóu la edil, que sí coincide na necesidá de fader un mantenimientu meyor nos postes de telefonía fixa.