Cangas del Narcea, 26 d'outubre de 2020. El Conceyu de Cangas vei controlar l'afluencia al cementeriu del Conceyu'l 1 de los santos. Asina lo reflecta no bandu que firmóu güei pola mañena l'alcalde, José Víctor Rodríguez, qu'explicóu que la Policía del Conceyu vei encargase de controlar los aforos al cementeriu los días 30 ya 31 d'outubre ya'l 1 de los santos.  Las/os usuarias/os que quieran acudir han fadelo con mázcara, manteniendo la distancia de seguridá ya yendo namás dous miembros por cada familia, pudiendo asistir un máximu de tés familiares en casu de personas dependientes ou con movilidá reducida.

El rexidor recomendóu a las vecinas ya los vecinos la visita al cementeriu unos días antias ou unos días espuéis a Tolos Santos: "nun hai necesidá de yir tolas personas el mesmu día", dixo cona intención de reducir los aforos ya evitar aglomeraciones, "queremos fader del cementeriu un sitiu seguru durante los días vinientes".  A la entrada, vei instalase un dispensador de xel pa desinfestase las manos ya van colocase carteles informativos que recuerden la obligatoriedá del usu de la mázcara, qu'ha tapar las narices, la boca ya'l cazu. Amás, van instalase elementos que separen l'accesu ya la salida, cono fin d'evitar cruces innecesarios de personas.  Vei quedar prohibío dafeitu compartir materiales ya recursos cumo escaladas ou productos de l.limpieza ya l'usu del augua ha fadese de manera escalonada.

Prohibiciones

Nun vei poder asistir al cementeriu baxo niún conceptu si ía un casu confirmáu de COVID-19, ta a la espera de conecer los resultaos d'una PCR, tien contactu estreitu con una persona enferma ou presenta cualquier síntoma compatible cona enfermedá. Recomiéndase la non asistencia de persona que por edá ou por patoloxías de riesgu, seyan consideradas cumo vulnerables. 

Estas recomendaciones van tar supeditadas, en todu casu, a la evolución de la situación epidemiolóxica ya al cumplimientu de la normativa sanitaria en vigor.