El Conceyu de Cangas del Narcea celebróu anueite pola tarde una regunión informativa na que se dienon a conocer los requisitos necesarios pa formar parte de la Rede Cangas ensin Gluten ya un total de 23 establecimientos firmanon el sou compromisu ya sumánonse al proxectu.
La Rede Cangas ensin Gluten ta abierta a todu tipu de negocios cangueses relacionaos cona hostelería, la restauración ya l'alimentación, porque, a la final, trátase de qu'estos negocios sean seguros pal colectivu celíacu. D'ehí, qu'unu de los requisitos de la Rede Cangas ensin Gluten implique recibir la formación necesaria pa ofrecer un serviciu seguru a las personas que tienen que prescindir del gluten na súa dieta.  
"Tamos mui satisfechos cona acoyida d'un proxectu precursor n'España, qu'amás yía ambiciosu ya responsable. La idea yía ir sumando más establecimientos que quieran ofrecer los sous productos d'una manera segura al colectivu celíacu", explica Begoña Cueto, conceyala de Turismu ya Desenvolvimientu del Conceyu.  
"La formación ta adaptada a cada tipu de negociu ya, al traviés d'el.la, explicamos a los participantes tanto la enfermedá celíaca cumo las esixencias d'una dieta ensin gluten, mirando siempre d'evitar la contaminación cruzada, el gran problema que tenemos los celíacos fuera casa", apunta Lorena Pérez, directora de Celicidad, entidá especializada en celiaquía, dieta ensin gluten ya restauración ya colaboradora, amás,  no proxectu Cangas ensin gluten.
Hasta la fecha,  la Rede Cangas ensin Gluten cuntaba con un total de 11 restoranes, 14 casas rurales con opciones ensin gluten no almuerzu, 1 obrador 100 % ensin gluten, Isacel, ya una fábrica d'embutíos tamién 100% ensin gluten, Santulaya. Agora la rede vei sumar 20 establecimientos más, qu'inclúin carnicerías, quioscos, bares, restoranes, tiendas d'alimentación ya agospiamientos de todu tipu qu'empicipiarán la formación qu'ofrez Celicidad esta sumana.

Primer destín ensin gluten d'España

Cangas del Narcea l.lieva cuasi trés años trabayando nesti proxectu que se presentóu en xineiru en FITUR ya convirtíu al conceyu no primer destín ensin gluten del país. "Con esti proxectu innovador abrimos el nuesu destín turísticu a un nichu de mercáu mui importante ya específicu ya fadémoslo con responsabilidá ya conocimientos. Los que s'aveiren a conocer la nuesa tierra van poder disfrutar de la nuesa gastronomía magnífica cona mesma tranquilidá que cuando comen en casa", apunta Cueto.
"La gran cantidá de restoranes ya agospiamientos qu'alcontramos en Cangas yía algo que nun s'alcuentra en niún outru sitiu de características parcidas. Los celíacos tiénenlo mui fácil en Cangas a la hora de disfrutar d'un ociu seguru, por eso, cada vez son más los turistas que visitan el conceyu pa disfrutar d'una gastronomía  tradicional excelente ya ensin gluten", siñala Pérez.  
El Conceyu, xunto con Celicidad, empicipia cona formación de los negocios cangueses que s'incorporan a la rede ya trabaya pa la edición tercera de las Xornadas Cangas ensin Gluten, que se celebrarán no mes del celíacu, en mayu, con fecha tovía por concretar. "Cumo n'ediciones anteriores, las xornadas van cuntar cona participación de profesionales de la salú que darán charlas, amás, haberá actividades pa nenas ya nenos, talleres de cocina ya, por supuesto, restauración ensin gluten pa tódalas personas que visiten el primer destín ensin gluten d'España", conclúi Begoña Cueto.  

Qué yía Cangas ensin Gluten

Cangas ensin Gluten yía un programa del Conceyu de Cangas del Narcea pal impulsu ya promoción de negocios responsables cono colectivu celíacu ya conas súas necesidades d'alimentación. El proxectu, precursor n'España, presentóuse oficialmente en FITUR 2018 ya convertíu yá a Cangas no primer destín ensin gluten d'España. Trátase d'un productu turísticu que completa la ufierta rica ya variada del mayor conceyu d'Asturias.
Qué yía Celicidad
Celicidad yía un espaciu dixital  especializáu en celiaquía, dieta ya restauración ensin gluten, cono obxectivu de facilitar la vida del colectivu celíacu al traviés de la divulgación, la difusión d'información relativa a la enfermedá, la formación de restoranes ya la organización d'eventos relacionaos cono mundu ensin gluten. Amás, son organizadores ya colaboradores xunto cono Conceyu de Cangas del Narcea del proxectu Cangas ensin gluten, que celebrará en mayu la súa edición tercera.