Cangas del Narcea, 23 de los santos de 2020. El Conceyu de Cangas del Narcea, al traviés de la Conceyalía de la Muyer, decidíu conmemorar el Día Internacional contra la Violencia de Xéneru l.lendo un manifiestu de manera telemática. Pa fadelo, el consistoriu cangués editóu un vidiu que vei publicase nas redes sociales el 25 de los santos, nél, participanon quince muyeres de puntos diferientes del conceyu, baxo'l lema: "Siempre hai con quien cuntar, nun t'esqueices". "Pensáramos fader un actu no parque de La Reguerala, pero al nun poder xuntanos por culpa la pandemia, decidiemos editar esti vidiu l.lendo'l manifiestu", explicóu la conceyala de Salú Pública, Igualdá, Muyer ya Drechos Sociales de Cangas del Narcea, Carmen López.  

No manifiestu, déixase claro que las muyeres del entornu rural tienen dificultades especiales pa salir de la violencia de xéneru: l'aislamientu, lo l.luenxe que viven, la soledá, la dispersión de recursos ou la dependencia económica mayor son factores que fain especialmente difícil esa ruptura cono vínculu nocivu. Una dificultá a la que se suma'l contextu nel que se produz el maltratu, en casas unifamiliares, que convierten esta lacra n'invisible. Por eso, la conceyala d'Igualdá, animóu a los vecindarios a denunciar los malos tratos, "hemos ser todas ya todos partícipes d'el.lo, la sociedá no sou conxuntu, ya nun deixar un casu solu ensin denunciar". 

Las muyeres participantes no vidiu pertenecen a l'Asociación Cultural y de Mujeres " Peña El Rodabiel", de Tresmonte; a la Asociación Cultural "Lo Nueso", a l'Asociación de Muyeres de Mual, a l'Asociación de Muyeres "Las Teixeras", d'Oubachu; a l'Asociación Cultural y de Mujeres "Aldonza", de Courias; a l'Asociación Cultural "El Arándano", d'El Pueblu Rengos; a l'Asociación de Mujeres de Bruel.les, a l'Asociación de Mujeres Campesinas de Asturias, a l'Asociación de Mujeres "V. de las Veigas", de Bisuyu; a l'Asociación de Mujeres "Puchanca", de Cibuyu; ya a l'Asociación Cultural y de Mujeres "Las Xanas", de Xedré. Amás, intervinienon María José Fernández García, asesora de la Muyer de Cangas del Narcea; Carmen López, conceyala de Salú Pública, Igualdá, Muyer ya Drechos Sociales de Cangas del Narcea; ya Belén Fernández Rodríguez, axente d'Igualdá de Cangas. El vidiu, con una duración aproximada de pouco más de seis minutos, ta acompañáu d'un cantar tituláu "Música para el viaje del tiempo", del qu'ía autor ya intérprete'l profesor de la Escuela de Música del Conceyu Cangas Óscar Rodríguez Riesco. 

Moción

A la lectura d'esti manifiestu, súmanse outros actos qu'aídan a visibilizar la violencia de xéneru, cumo la iluminación de la Casa Conceyu, que vei tar tiñida de morao durante toda la sumana; la colaboración conas actividades que se fain dende l'institutu cangués ou la moción que se pretende aprobar no Plenu próximu. Amás, durante todu l'añu, el Conceyu de Cangas visibiliza esta l.luita cono cartel instaláu no parque de La Reguerala, ou se deixa claro: "Cangas del Narcea contra las violencias machistas". Tamién se ponen a disposición de las muyeres servicios cumo'l Centru Asesor de la Muyer ou l'Axencia d'Igualdá del Conceyu, qu'aídan ya apoyan a las víctimas de malos tratos.  López anuncióu que la Casa Conceyu ta fadiendo unas bases pa convocar próximamente la plaza de psicólogu ou psicóloga, pa reforzar el trabayu que se vien fadiendo no Centru Asesor de la Muyer, qu'aída a las víctimas de violencia de xéneru, "entendemos qu'ente todas ya todos hemos l.luitar pa erradicar esti drama humanu", apuntóu la edil.