El 12 de noviembre celébrase'l Día Européu del Enoturismu. Esta iniciativa qu'eichóu a andar la Rede Europea de Ciudades del Vinu (RECEVIN) no 2009 celébrase en países cumo Italia, Francia ya Portugal, amás d'España, ya'l sou obxectivu yá promocionar los territorios vinícolas cumo activos económicos estimulando l'enoturismu, un sector que cada vez tien más demanda ya aceptación.  
Por esti motivu, l'Asociación de Museos del Vinu d'España propón por primer vez una acción colectiva de los sous museos, pa sumase a las actividades programadas pa esi día, ufiertando Free Tours polas súas instalaciones ya exposiciones durante la sumana de celebración del Día Européu del Enoturismu. Dieciocho museos miembros de l'asociación, que n'actualidá ta compuesta por más de trenta socios, súmanse d'esta manera pa mostrar los sous espacios ya colecciones sobre la cultura'l vinu ya las súas singularidades  de manera coordinada. Los participantes van poder disfrutar de museos de comunidades autónomas cumo Castía, Asturias, La Rioja, Andalucía, Cataluña, Extremadura, Aragón o Comunidá Valenciana.  
Tódolos fondos recaudaos nos Free Tours van ser donaos a la Fundación Aladina, qu'ayuda a nenos ya adolescentes enfermos de cáncer ya a las súas familias.

Sobre los Free Tours

Un free tour yá una visita guiada a un espaciu turísticu/ cultural que se caracteriza por nun tener una tarifa fixa de coste. D'esta manera, las personas visitantes tienen la opción, n'acabando la visita, de pagar la cantidá que consideren oportuna pol serviciu en función del grau de satisfacción de las súas expectativas.

Sobre l'Asociación de Museos del Vinu d'España

L'Asociación de Museos del Vinu d'España yía un colectivu sin ánimu de lucru creáu no añu 2005 pa promover la conservación ya difusión de la cultura'l vinu al traviés de los sous museos. Na actualidá cunta con 35 miembros de titularidá pública ya privada ya, ente las acciones que fai no añu ta la celebración d'un Simposiu Nacional sobre cultura del vinu, que no añu 2019 vei celebrar la edición consecutiva diecisiete no muséu del vinu de Cangas del Narcea. 

Celebración del Día Européu del Enoturismu no Muséu del Vinu de Cangas

El Muséu del Vinu de Cangas, cumo miembru de l'Asociación de Museos del Vinu d'España, colabora con esta iniciativa pa celebrar el Día Européu del Enoturismu.
El sábadu 10 de los santos, a las 16:30 horas, ofreceráse una visita al Muséu del Vinu, una visita guiada al l.lagar de San Tisu ya una degustación de vinu Denominación d'Orixe Protexida de Cangas.