La Fiesta de la Vendimia de Cangas del Narcea, cita ineludible na axenda asturiana pal mes d'outubre, demostróu ser una fiesta pa tódolos públicos. Pa los que tán ya pa los que vienen. Pa las personas que disfrutan d'una bona copa de vinu de Cangas, pero tamién pa las personas que, por edá, inda nun pueden fadelo.

Pa empicipiar, ente los días 8 ya 11 d'outubre, alumnáu d'infantil ya primaria de los centros educativos CP Alejandro Casona, CP Maestro Casanova, CP Oubanca, CRA Naviegu ya CRA Santarvás vei tener la oportunidá de participar en talleres bien interesantes que lu van aveirar a la tradición vinícola dende un puntu de vista científicu ya experimental. Las propiedades antioxidantes de la uva ya'l sou usu na cosmética ou en procesos cumo la pasteurización, ente outros, yá nun van tener secretos pa las nenas ya nenos cangueses, gracias al desenvolvimientu d'estas actividades, que van fadese nos propios centros educativos ya van ser impartíos por Ana María Fernández Cueto, científica ya consultora alimentaria.

Amás, durante los días festivos, los/las más pequenos/as van tener la oportunidá de faer estos ya outros talleres na carpa instalada en La Plaza la Oliva. Talleres d'alfarería, de debuxar con vinu ou deprender bail.les tradicionales de Cigales (Valladolid) van ser namás dalgunas de las propuestas que van convertir a nenos ya nenas en participantes activos/as de la fiesta.

La conceyala de Turismu, Begoña Cueto, considera estas actividades infantiles fundamentales a la hora d'aveirar la tradición vinícola a las/los más pequenas/pequenos. Espertar el sou interés ya enseñalas/los a valorar la importancia que'l vinu tien pal conceyu puede ayudar, afirma, a asegurar el relevu xeneracional nos años vinientes.

Igualmente, l'actividá más popular de la vendimia, nun hai duda, vei ser la pisada infantil, no Muséu del Vinu los días 12, 13 ya 14, a las 12:00 la mañena. Las nenas ya nenos, de 4 a 14 años, van vendimiar las uvas de las cepas del muséu ya faer el sou propiu mostu. Colabora con esta actividá Aprovican.