La ufierta presentada implica a profesionales d'ámbitos bien diferientes, lo que contribúi a garantizar unas xornadas formativas tresversales, que tratan cuestiones tan interesantes cumo'l cine ya los medios de comunicación: la tresmisión de roles; la violencia de xéneru: una visión multidisciplinar; los exercicios ya actividades pa meyorar la salú femenina, la intelixencia emocional ya la toma de decisiones, las reflexones sobre igualdá d'oportunidades, la violencia de xéneru ya las relaciones sanas, la l.literatura con perspectiva de xéneru, el flandón, la muyer cumo tresmisora de la cultura tradicional; los proxectos empresariales pa la inserción de las muyeres na zona rural ou la sexualidá femenina.

N'acabando estas xornadas, vei faese un alcuentru d'asociaciones de muyeres ya un piel.le oficial con xanta d'harmandá ya bail.le.

El plazu pa inscribise acaba'l 30 de setiembre ya puede faese al traviés de las propias asociaciones de muyeres.

En palabras de la conceyala d'Igualdá, Carmen López Martínez: «Esti tipu d'iniciativas garantizan la igualdá d'oportunidades doblemente, yá qu'acercan una ufierta ambiciosa ya completa a la zona rural ya convierten a las muyeres nas súas protagonistas, dotándolas d'un espaciu propiu de desenvolvimientu ya socialización onde compartir experiencias ya disfrutar».