Narcenatur vuelve al calandariu d'actividades canguesas con un programa fuerte. El Mercáu (Plz. Casa Conceyu) vei ser el puntu central de la feria ya nél tarán asitiaos expositores sectoriales. Begoña Cueto, conceyala de Turismu, afirmóu qu'estiañu subiera'l númaru de peticiones d'expositores pa Narcenatur, lo que feixo que namás se pudieran conceder 28 permisos a las 35 peticiones existentes.  Cueto explicóu que todo esto yera debío al sitiu onde van a asitiase los cazadores ya las asociaciones colaboradoras, qu'estiañu ocupan el corazón de Narcenatur ya van faer las entregas de trofeos na entrada de la Casa Conceyu. "Tomamos esta decisión porque quien son una parte central de Narcenatur merecían tar rialmente presentes na súa celebración ya la decisión fui acertada, porque espertóu un mayor interés ente los expositores", dixo tamién.

Las actividades que'l Conceyu Cangas organizóu en colaboración con asociaciones colaboradoras inclúin el taller d'iniciación al Nordic Walking, tiru al platu ya un simulador de tiru con arcu. "Amás, estiañu cuntamos cona novedá de la Marcha Cicloturista Luis Pasamontes, que vei aveirar el disfrute de la naturaleza en bicicleta a las personas participantes", aseguróu Cueto. Narcenatur tendrá tamién un mercáu artesanu ya ecolóxicu polas cal.les de la vil.la. La idea yía potenciar l'artesanía ya la venta de productos de fabricación propia ya disfrutar en compañía del conxuntu de los vecinos. El mercáu vei tener trenta puestos d'artesanos ya productores.
Outra de las actividades a destacar vei ser la presentación no Teatru Toreno del documental Cantábrico. Cantábrico fui grabáu, en parte, no Parque Natural de Fontes del Narcea ya yía un elementu de promoción fundamental pal nuesu conceyu, en cuanto a turismu de naturaleza ya observación d'osu ya fauna, sigún explicóu la conceyala de Turismu.
Durante'l fin de sumana, van poder faese tamién muitas actividades no mediu natural, cumo observación de fauna, rutas de monte, observación d'estrel.las ou recorríos pol paisaxe de las viñas. Todas el.las guiadas por asociaciones de la zona, cumo GECA, Grupu de Montaña "Piélago" ou la DOP Vinu de Cangas.  
No tocante a las conferencias, la organización cunta cona participación de Miguel Heras, corredor de montaña d'ultra trail, Michel Coya, expertu n'armas ya cartuchería, ya Stefano Garzelli, Lucas Ordoñez ya J. Andrés Medina, xunto a Luis Pasamontes, que van falar del respetu a los ciclistas na carretera.
La conceyala de Turismu,  Begoña Cueto, xunto cona Sociedá de Cazadores "El Narcea", l'Asociación de Pescadores "Fuentes del Narcea" ya l'ACA "Cicloastur" son los encargaos de dar a conocer las actividades principales de Narcenatur 2017.