Güei, la Conceyalía de Cultura del Conceyu Cangas presentóu la súa programación de Navidá, caracterizada pola cantidá, la calidá ya la variedá de las propuestas.

Abre'l ciclu'l día 24 la visita tradicional de Papa Noel, que recibirá a las nenas ya nenos de Cangas n'horariu de mañena, ente las 12:00 ya las 14:00 horas, ya de tarde, ente las 18:00 ya las 20:00 horas.

El miércoles 26, pasaos los excesos de Navidá, el públicu más pequenu tendrá la oportunidá de siguir la diversión no primeiru de los taller programaos, dedicáu a los hama beads. Esti taller aprovechará estas creaciones con abalorios pa explotar la súa creatividá infinita.

El día 27, pola súa parte, la música será la protagonista de la xornada ya deleitará a grandes ya pequenos no musical con cantares de Cantajuegos.

El vienres 28, la diversión yá será definitiva gracias a la fiesta d'hinchables.

Al outur día, el sábadu 29, la xente más menuda despidirá l'añu cona anticipación debida nuna fiesta de Fin d'Añu espectacular.

El domingu 30, retomaránse los talleres con unu destináu a la creación de chapas.

El día qu'acaba l'añu, los más pequenos tamién tendrán la súa fiesta particular, repitiendo diversión nos hinchables.

La sumana na que nos visitan SS. MM. inda vendrá más cargada de sorpresas, abrirá'l miércoles 2 con una obra celebrada ya aplaudida, Hansel y Gretel, premiu Nel Amaro 2018, que será interpretada pola compañía Higiénico Papel Teatro.

El xueves 3, acabarán los talleres infantiles con un taller d'abalorios de madera. 

El vienres 4 de xineiru, Aliatar recoirá las cartas pa los Reis Magos, n'horariu de mañena, de 12:00 a 14:00, ya de tarde, de 18:00 a 20:00 horas, ya, p'acabar esta programación espectacular, cerrará las fiestas el 5 de xineiru una cabalgata cargada de sorpresas, onde l'espectáculu ya la ilusión tán garantizaos.

La conceyala de Cultura, Carmen Riesco, anima a tola sociedá canguesa a disfrutar d'estas fiestas ya a participar de tolos eventos culturales que las acompañan, contribuyendo a mantener ya alimentar una ilusión pola maxa, l'arte ya la propia cultura que nun debía perdese enxamás.