La Conceyalía de Turismu ta acabante renovar ya ampliar la súa siñalización turística nos núcleos ou espacios con más atractivos del conceyu. Los paneles ya las indicaciones, colocaos, cumo dicimos, nos entornos de más interés,  indican ou apurren información complementaria sobre'l santuariu de L'Acebu, el pueblu exemplar de Mual, la cerámica negra de L.lamas del Mouru, el barriu de bodegas de San Tisu ou Bisuyu, pueblu natal d'ilustres del ámbitu de las L.letras ya la investigación lingüística cumo Alejandro Rodríguez Álvarez ¿Casona¿ ou Lorenzo Rodríguez-Castellano, respectivamente.
    Concretamente, la Conceyalía de Turismu colocóu siñales en: L'Acebu, onde la siñalización, amás de tar mui desgastada, tenía pouca visibilidá  ya nun cuntaba, cumo agora, con indicaciones pa turismos, camiones ya autobuses, amás, incluíuse la siñalización característica de sitiu turísticu, más específicamente, de santuariu, no nucliu rural de L'Acebu; polo que se refiere a Bisuyu, siñalizóuse cumo nucliu rural d'interés; colocánonse, amás, dous paneles especiales diseñaos por Neto, unu a la entrada de Mual, indicativu de Pueblu Exemplar, con alusión a la vida ya las tradiciones del pueblu, motivos polos que fui galardonáu; ya outru no Paséu del Vinu ya no barriu de San Tisu; tamién se  puxo un cartel de cerámica negra reponiendo l'anterior, que manifestaba un desgaste fuerte.

    Con esti tipu d'iniciativas, l'aria de Turismu pretende meyorar ya incentivar l'actividá turística nun enclave natural tan importante cumo'l nuesu, que, amás de cuntar con un paisaxe sobresaliente, cunta con una cultura fascinante por descubrir. Tal ya cumo manifiesta la conceyala del aria, Begoña Cueto: «La bona siñalización de los sitios d'interés resulta fundamental pa las personas que nos visitan ya contribúi a dinamizar el turismu na zona, por eso, tolos años, van renovándose siñales, bien d'accesu a pueblos, bien d'accesu a zonas d'interés ou rutas turísticas».

    Nun yá esti'l primer añu nel que se renueva la siñalización p'atender a las demandas turísticas de la zona, l'añu pasáu féixose lo propio no nucliu de Bisuyu indicando los sitios que visitar al traviés d'una ruta pol pueblu. La ruta interpretada ta plasmada nun panel a la entrada del pueblu, enfrente del Centru d'Interpretación Alejandro «Casona». Amás, na zona d'El Mazu, outru panel indica la estructura, el funcionamientu ya la historia d'esta pieza clave de las ferrerías. La conceyala apunta: «Son muitos los visitantes que s'aveiran a Bisuyu fuera de los horarios de las visitas guiadas, polo qu'estos paneles facilitan que puedan conecer de manera autónoma la riqueza del pueblu ya guiase pola súa cuenta pa visitalu».
    Todas estas actuaciones de meyora fináncianse conas subvenciones qu'añalmente destina la Conseyería d'Economía ya Empléu  a las actividades d'interés turísticu nas entidades locales, concretamente cona linia 2.2, específica pa siñalización turística.

    Nestos dous años d'implementación ya meyora, el coste destináu a siñalización subíu a 2.910 euros no 2017, onde se contóu con una subvención de 654 euros ya a 2.654, 05 euros no 2018, onde la subvención fui de 488 euros.

    P'acabar, la conceyala de Turismu anima a propios ya extraños a a valise d'estos recursos informativos, pa indagar ya conecer un pouquenín más esti gran universu chen de cousas chocantes ya atractivos qu'ía Cangas.