El Plan de Drogas del Conceyu Cangas propón un taller nuevu de parentalidá positiva de 12 sesiones, nél, van abordase temas variaos qu'afectan a las relaciones ente padres ya fíos.

El cursu pretende ser un recursu qu'apoye'l l.labor educativu de los padres, trabayando con el.los pa consiguir los obxectivos siguientes:

• Comprender el comportamientu humanu pa poder entender por quéi ya cúmo se producen las relaciones padres/madres-fíos/fías.
• Comprender las emociones ya los sentimientos propios ya ayenos.
• Estimular el desenvolvimientu de los fíos ya las fías d'un modu efectivu.
• Meyorar la comunicación  ente padres/madres ya fíos/fías de modu que se sientan escuitaos ya comprendíos.
• Desenvolver habilidades d'escuita, de resolución de conflictos, d'exploración d'alternativas ya de toma de decisiones.
• Deprender a prevenir problemas de disciplina.
• Prevenir problemas que suponen retos pa los padres (drogas, embaranzos, adicciones...).

Las clases van ponese na Casa la Cultura "Palaciu d'Oumaña", aula del pisu -2, a partir del 10 de xineiru tolos miércoles n'horariu de mañena ou tarde pa los padres, ya a partir del 11 del mesmu  mes  tolos xueves n'horariu de tarde, de 17 a 19, pa los adolescentes.

Las personas interesadas pueden apuntase presencial ou telefónicamente (985 81 05 60) no Plan de Drogas del Conceyu, El Paséu, 13, baxu.