La Conceyalía de Turismu presentará este vienres a las 11 horas na Casa la Cultura "Palaciu d'Oumaña" una serie nueva de materiales a fin de meyorar cualitativamente la proxección turística del conceyu ya favorecer la súa promoción tanto dende los dispositivos móviles cumo dende los soportes en papel más tradicionales.

Los materiales nuevos comprienden una app pa descargar conteníos nos dispositivos móviles, un mapa del conceyu ya la vil.la actualizaos, nos que s'insiste particularmente nos recursos turísticos, ya una guía.

Polo que se refier a l'aplicación móvil cunta con varios conteníos dividíos en: Cangas del Narcea, Guía, Mediu Natural, Patrimoniu Cultural, Feito aiquí ya Nun puedes perdételo. El primeiru d'el.los fai una introducción a la historia, la xeografía ya las características xenerales del nuesu entornu; el segundu de los apartaos apurre información no qu'a servicios no ámbitu de la restauración ya la hostelería ofrez el conceyu; los dous siguientes espacios falan de las posibilidades d'esparcimientu que los ámbitos propiamente aludíos ufiertan; Feito aiquí da información sobre los productos de producción propia ya Nun puedes perdételo céntrase nos atractivos turísticos por antonomasia.

La guía ya'l mapa, pola súa parte, fan un repasu por tol potencial turísticu de la zona ya ofrécenlu nun diseñu atractivu ya prácticu.
La conceyala de Turismu, Begoña Cueto, manifiesta la súa satisfacción énte estos materiales de promoción modernos ya renovaos, en particular pola facilidá ya la versatilidá cona qu'ofrecen el potencial turísticu cangués.