La Escuela de Música del Conceyu Cangas cierra'l sou periodu de matrícula con 210 alumnas/alumnos confirmadas/os.

Estas cifras implican a un personal compuestu por 11 profesoras/es distribuidas/íos nas asignaturas siguientes: música ya movimientu, l.linguaxe musical, pianu, guitarra, vigulín, flauta, clarinete, trompeta, saxofón, guitarra eléctrica, baxu, batería, folclore: bail.le ya percusión; gaita ya tambor, conxuntu instrumental ya coru.

Ente estas asignaturas hai dalgunas qu'inda nun completanon el númaru de plazas ufiertadas, polo que s'amplía'l periodu d'inscripción hasta Navidá. Pa más información, consultar na propia escuela.

Con motivu de la inauguración d'esti cursu nuevu celebraráse un actu de presentación oficial no Teatru Toreno'l xueves 15 de setiembre a las 17:00 horas, nél presentaráse al profesoráu ya daránse las directrices que van regular el desenvolvimientu del cursu, qu'empicipiará las súas clases el l.lunes 19.

Una de las finalidades perseguidas pol equipu directivu pa esti cursu escolar yía sacar la escuela a la cal.le, faer partícipe de la cultura musical a tola sociedá canguesa, pa faelo vei cuntase con una comisión técnica de trabayu.

La conceyala de Cultura, Carmen Riesco Combarro, considera esti cursu escolar qu'empicipia un símbolu claru del compromisu del equipu de gobiernu cona cultura musical, que se materializa nel aumentu d'asignaturas ya na propia l.linia de trabayu. Cumo muestra valga contrastar la infraestructura actual cona que cuntaba'l centru cuando abríu las súas puertas en setiembre del 2011: 69 alumnas/os ya 3 profesoras. Nos quince años que separan l'apertura de la escuela  del cursu escolar actual son muitos los cambios experimentaos, muitos los progresos ya clara l'acoyida positiva de los mesmos por parte de la ciudadanía.