Ente'l 4 ya'l 19 d'agostu, Cangas del Narcea tará presente na LXII Feria Internacional de Muestras d'Asturias, asitiada no recintu Luis Adaro de Xixón ya abierta tanto a profesionales cumo a públicu en xeneral n'horariu de 11:00 a 22:00 horas. Durante la celebración de la feria, el conceyu cangués aprovechará pa visibilizar los sous símbolos identitarios, muitos d'el.los representaos no  logo nuevu del  Aria de Turismu.

Destaca particularmente dientro de la promoción qu'ofrez esti stand de la Feria Internacional de Muestras d'Asturias, el 13 d'agostu, Día de Cangas del Narcea. Durante la xornada festiva, haberá música tradicional ya degustación de productos del país.

El stand 4, dientro del pabellón 4, de 36 metros cuadraos, será'l sitiu destináu a acoyer al Conceyu Cangas. La ubicación ta diseñada cudiadosamente, atendiendo a dúas máximas concretas, tradición ya diseñu. Igualmente, nun hai detalle casual, todo cunta con un simbolismu asociáu al conceyu. Por exemplu, los colores predominantes son el negru, dau que'l prietu asóciase a la minería, ya'l verde, que simboliza la naturaleza, grandes activos de la zona nos dous casos. El color vinu que determina la cultura de partida tamién forma parte d'esta simboloxía cromática, que nun deixa elementu sin representar, tal cumo lo fai'l logotipu propuestu pol diseñador cangués por excelencia, Neto del Castillo.

El logo respuende a las necesidades de visibilización turística del Conceyu ya cumple con tolos requisitos pa garantizala: imaxe sintética ya d'identificación, asimilación ya memorización rápida; comunicación moderna ya funcional ya capacidá semántica plena.

La imaxe nueva inclúi un símbolu ya un identificador (Turismu) ou un lema (L'Asturias por descubrir). Amás, inclúi las dúas iniciales del topónimu, la <C>, que se perfila cumo la cabeza d'un osu, elementu más que representativu de la fauna del conceyu, dao qu'en Cangas concéntrase la mayor población d'osu pardu cantábricu, ya la <N>, qu'inclúi un trazu rápidu ya pouco marcáu que nos tresporta a las montañas, predominantes no nuesu paisaxe. Siguen teniendo nesti diseñu, cumo nel del stand, una importancia crucial los colores, así, el color pardu evoca la riqueza histórica n'ouru d'esti territoriu, el verde vuelve a evocar la naturaleza ya l'azul retrotráenos automáticamente al ríu Narcea. Igualmente, estos trés tonos asimílanse cumo los propios de las nuesas estaciones: el doráu de la seronda, los verdes de la primavera ya'l branu ya l'azul del iviernu, lo qu'indica que los atractivos turísticos de la zona son atemporales.

La conceyala de Turismu, Begoña Cueto, explica que cona presentación oficial d'esta imaxe nueva ya fresca pretende facilitase la identificación de los activos turísticos del nuesu conceyu, concentraos na nuesa riqueza natural. Igualmente, indica que tanto la promoción del conceyu na FIDMA, con tolos matices expuestos ya cona inclusión de tolos productos propios por antonomasia  nun deixa de redundar na consolidación d'una marca de calidá que perfila, promueve ya dignifica l'aportación canguesa dientro del turismu nacional, del mesmu modu que lo fai la súa imaxe corporativa nueva.

Imágenes