Dende'l 20 de xunu ya hasta'l 30 de setiembre, vei funcionar un serviciu extraordinariu de l.limpieza polas cal.les de Cangas, de l.lunes a sábadu, n'horariu de 18:00 a 20:30.
Amás,     debío a la estrechez de la cal.le ya l'afluencia grande de xente nas terrazas, establezse tamién un sistema de recoyida de basura especial pa la c/ Mayor.

Begoña Cueto, conceyala de Desenvolvimientu del Conceyu, Turismu, Fiestas ya Mediu Ambiente, di que se trata, d'una parte,  de nun tener bolsas de basura polas cal.les, pol sou mal efectu, particularmente de cara al turismu; ya, d'outra, de facer por que'l camión de basura nun tenga que cruzar la cal.le no momentu no que la xente ta cenando nas terrazas.

Esti sistema ponse en funcionamientu cona colaboración de los establecimientos afectaos siguientes: Cantina, Casintra, Blanco, Café del Carmen, Areces, La Ruta ya Café Madrid.
Estos establecimientos cuntarán conos sous contenedores propios ya colaborarán na súa xestión. Del mesmu modu ya pa evitar perxuicios a los vecinos, dispondráse un contenedor pa los mesmos que vei colocar el serviciu de l.limpieza a las 20:30 horas na esquina de la calle Mayor cona Casa Conceyu. A partir de las 20:30 horas, el vecindariu podrá depositar la súa broza nesti contenedor ou nel colocáu na c/Diz Tirado. En niún casu van poder deixase bolsas de basura no suelu nin nos portales. Outramiente, dende'l sábadu a las 17:30 ya hasta las 20:30 del l.lunes, nun van poder depositase residuos nin siquiera nos contenedores a tal efectu, evitándose asina los malos golores que, por culpa la calor, pudieran producise. Yía particularmente interesante esti puntu últimu, porque redunda nuna mayor calidá de vida ya nuna meyor imaxe turística, precisando pa el.lo namás d'un esfuerzu pequenín compartíu.

En palabras de Begoña Cueto, conceyala de Mediu Ambiente, con esti sistema pretende conciliase'l mantenimientu de la vía pública cono disfrute de la mesma.     Asina, añade la edil, garantizaránse las dúas cuestiones, yá que los l.labores de recoyida ya xestión de residuos tendrán un  impactu mínimu na vida social canguesa ya tanto los vecinos cumo los turistas poderán disfrutar d'unas cal.les l.limpias.