Nos años últimos, víuse que cada vez son más grandes los grupos de peñas qu'asisten a la romería, prácticamente son las únicas que van a reservar espacios el día antias, ensin niún tipu d'organización, deixando fracos muertos qu'impiden  qu'outros grupos grandes puedan alcontrar el día de la romería un sitiu apropiáu al númaru de personas. Tamién medróu'l númaru de parrillas, que, asitiadas en cualquier sitiu d'El Prau del Molín, molestan cono fumu a quien tán cerca, amás de suponer un peligru pa los nenos.

Dende la organización de la romería, féixose necesario marcar parcelas pa las peñas, pa que tean colocadas de forma ordenada ya deixen espaciu pal públicu en xeneral. Tamién s'acordóu que las parrillas se dispongan na zona del ríu, na parte de fuera de la valla, se ía posible.

La organización procederá a marcar estos espacios el vienres pola tarde, deixando asina zonas amplias pal públicu en xeneral.

 Infórmase a las personas interesadas que vei permitise que tódolos grupos que deseen reservar sitiu pa la Romería d'El Prau del Molín puedan fadelo dende'l mesmu día 9 de santamarina a partir de las 7:00 h de la mañena.

NORMAS DE CONVIVENCIA

• Deberán respetase los sitios reservaos pola organización.
• Durante'l día de la romería, van poder instalase todu tipu de cenadores, toldos ya parasoles, plegables ya/ou desmontables ya tresportables na mano. En niún casu vei permitise la instalación de carpas fixas de muitu tamañu con estructuras.
• Ruégase que nun s'aparquen coches na baxada a las piscinas nin na parte de la ponte romana, pa permitir que la xente pueda acceder cona mercancía ensin xenerar atascos. 
• A partir de las 12:00 de la mañena del día 9, nun  deberá quedar niún vehículu nin remolque dientro d'El Prau del Molín.  Quien quiera descargar mercancía a partir d'esa hora deberá fadelo pola parte de la ponte romana.
• L'espaciu reserváu pa la fiesta d'espuma vei poder usase pa comidas, siempre que se deixe l.libre a las 16 horas. Habilitaráse un espaciu concretu pa la espuma pa los nenos más pequenos.
• N'acabando la romería, El Prau del Molín debe quedar recoyíu, nun pueden deixase mesas, sillas, parrillas, toldos, etc. Dispondráse d'un bon númaru de contenedores repartíos por todu El Prau del Molín, pa facilitar los l.labores de l.limpieza ya recoyida de restos de los asistentes. 
• Na zona de debaxo las piscinas, van ponese baños públicos. Tarán abiertos ya ensin vixilancia, cono que pídese que s'usen de forma correcta. Se ruempe algo o s'atascan, haberá que cerralos.