Cangas del Narcea, 9 de santamarina de 2020. El Conceyu de Cangas del Narcea empicipióu esta sumana la l.limpieza ya l'esbroce de las vías de Las Montañas, El Cotu ya Rengos, correspondientes a los lotes 2 ya 3 de l'adxudicación del Plan d'Esbroce 2020, que prevé l.limpiar 216 kilómetros de caminos del conceyu. "Ía una actuación mui importante que cumple con un obxectivu triple: aumentar la seguridá vial, meyorar la imaxe de las carreteras ya faer una l.limpieza que valga d'escudu amortiguador de queimas forestales", dixo la teniente d'alcalde ya conceyala de Mediu Ambiente, Laura Álvarez, que feixo una vista pa supervisar los esbroces que se tán fiendo combinando maquinaria pesada ya trabayos manuales. 

Esti Plan d'Esbroces, que cada añu executa'l consistoriu cangués, "convertíuse nuna actuación ordinaria d'esti Conceyu, que femos a principios del branu p'amortizar la inversión". Los trabayos d'estos dous lotes  ta fadiéndolos la empresa IDINAT Obras ya Servicios S. L., a la que se-y adxudicóu por un importe de 10.539,05 ya 13.504,15 euros ensin IVA la l.limpieza de los lotes 2 ya 3, espuéis de competir con outras díaz empresas na licitación. En total, ta prevista una inversión de 71.018,32 euros con impuestos incluíos. El Conceyu tien pendiente empicipiar cona l.limpieza de más de 100 kilómetros de la zona noreste de Sierra ya la ribera del Narcea, que correspuende al lote 1, l'adxudicación resolveráse nos días próximos, cuando la empresa complete la documentación.