Condiciones pa la contratación de la barra del bar nas fiestas del Carme ya la Madalena 2019.

1.- OBXECTU

L'obxectu d'estas condiciones yá dotar al parque de Los Nogales (recintu nel que se van celebrar las verbenas) d'un serviciu de bar los días 14, 15, 16, 21 ya 22 de santamarina de 2019.
En casu de variación nas fechas de las verbenas, entenderáse autorizáu'l serviciu de bar pa las mesmas.
L'asitiamientu de la barra vei indicalu'l personal del Conceyu Cangas, que vei marcar tamién los espacios máximos a ocupar (20,5 m). Outramiente, la instalación de la barra fairáse ensin afectar las entradas d'establecimientos, garaxes ou viviendas ya deixando espaciu suficiente pal tránsitu de vehículos d'emerxencia ya de l.limpieza.
Nun van poder vendese bocadillos, pinchos nin alimentos parecíos, tampouco van poder colocase sillas ya mesas.

2.- PLAZU D'OCUPACIÓN

La barra ha quedar montada'l 14 de santamarina. L'horariu de funcionamientu vei ser el propiu de las verbenas, desde las 22:00 horas hasta'l fin de las mesmas. 

3.- CRITERIOS DE ADXUDICACIÓN

El criteriu únicu vei ser el canon más altu ufiertáu.
Valoración mínima: 19.800 euros (DECINUEVE MIL OCHOCIENTOS EUROS).

4.- PLAZU YA SITIU DE PRESENTACIÓN

La ufierta ha axustase a lo previsto nestas condiciones.
Las personas que se presenten a la licitación nun van poder presentar más d'una ufierta.
Las ufiertas van poder dunviase por corréu postal ou presentase nas oficinas del Conceyu Cangas asitiadas n'El Paséu (C/Uría), 13, baxu (33800, Cangas del Narcea) hasta'l 30 d'abril de 2019 a las 14:00 horas. 

5.- DOCUMENTACIÓN A PRESENTAR

Las personas interesadas van presentar la súa ufierta nun sobre cerráu adecuadamente, debiendo incluir no mesmu la lienda siguiente: UFIERTA ECONÓMICA PA LA INSTALACIÓN DE LA BARRA DEL BAR DE LAS FIESTAS DEL CARME YA LA MADALENA  2019.
Dientro'l sobre ha contenese la declaración responsable axustada al modelu que se recói no Anexu I de las condiciones presentes, debidamente cubierta ya firmada.

6.- APERTURA D'UFIERTAS

N'acabándose'l plazu de presentación d'ufiertas, vei fadese un actu públicu d'apertura de las mesmas al que van poder asistir tolas personas solicitantes. Esti actu vei faese'l 7 de mayu de 2019, a las 11:00 horas, na Sala de Plenos del Conceyu de Cangas del Narcea.
L'empate ente dúas ou más ufiertas, resolveráse mediante sortéu. Nun vei fader falta la presencia de tódalas personas que se presentan a la licitación pa proceder al sortéu.

7.- REQUERIMIENTU DE DOCUMENTACIÓN

N'adxudicando la barra, la persona adxudicataria ha presentar la documentación siguiente antias de tomar posesión de:

• Documentos acreditativos de la personalidá xurídica ya de la capacidá d'obrar. Las empresarias ya empresarios que sean personas xurídicas van apurrir la escritura de constitución, xunto conos estatutos en vigor ou l'acta fundacional.  
• No supuestu d'empresarias ya empresarios individuales, van acompañar la copia del Documentu Nacional d'Identidá.
• Documentos acreditativos de la representación. Las personas que comparezan ou firmen proposiciones en nome de personas xurídicas ou d'outras personas naturales han presentar documentación acreditativa de representación ou apoderamientu.  
• Certificáu acreditativu de tar al corriente de las súas obligaciones tributarias cona Axencia Estatal ya la del Principáu d'Asturias.  
• Certificáu acreditativu de tar al corriente de las súas obligaciones cona Seguridá Social.  
• Póliza de seguru que cubra polo menos las responsabilidades civiles frente a terceras personas los días de celebración de la festividá, amás de durante'l periodu de montaxe ya desmontaxe de las instalaciones. El capital mínimu aseguráu ha ser de 300.000 euros

8.- EXAME DE DOCUMENTACIÓN YA SUBSANACIÓN

Recibida la documentación a que se refier la cláusula anterior, examinaráse la mesma ya, en casu de presentase incompleta ou con defectos, daráse a la persona adxudicada un plazu máximu de TRÉS DÍAS HÁBILES pa la súa subsanación.  
En pasando esti plazu, si la persona adxudicada nun subsanase, entenderáse que retiróu la ufierta, procediéndose a recabar tola información a la persona que presentara la ufierta meyor siguiente. Esti procedimientu aplicaráse sucesivamente si se repitieran las circunstancias respectu a las demás personas que participaran na licitación.

9.- ADXUDICACIÓN DE L'AUTORIZACIÓN

L'autorización vei dala l'órganu competente. 

10.- PAGU DEL CANON

El canon abonaráse íntegramente antias d'empicipiar la explotación. El pagu fairáse mediante tresferencia bancaria no númaru de cuenta siguiente de COFECA:    ES17-2048-0016-7934-0000-4412
L'impagu del canon implicará la revocación automática de l'autorización.

11.- RIESGU YA VENTURA

La explotación de las instalaciones fairáse sin riesgu ya ventura de la persona adxudicataria de l'autorización. COFECA nun participa de niuna manera na financiación de l'actividá nin asegura recaudación nin rendimientu mínimos.

12.- SUSPENSIÓN DE L'ACTIVIDÁ POR COFECA

COFECA vei poder acordar la suspensión de la totalidá ou parte de la explotación en cualisquier momentu por razones d'interés públicu, ensin xenerar drechu a indemnización cuando se produzan daños no dominiu públicu.
Amás, la explotación vei poder ser suspendida cuando concurra causa de fuerza mayor qu'imposibilite'l desenvolvimientu de l'actividá, compensando a la persona interesada polos gastos qu'acredite -excluyendo l'alquisición de consumibles- hasta un máximu de 300 ¿ ou l'importe equivalente al tiempu que quedara d'explotación, si la suspensión se produz desque yá empicipióu la explotación. 

13.- INSTALACIONES

Vei faese por cuenta de la persona adxudicataria la instalación ya conservación de los elementos necesarios pal desenvolvimientu de l'actividá. La tipoloxía ou modu d'instalación vei ser condicionada por COFECA por causas d'interés públicu debidamente xustificadas. 

14.- DRECHOS DE LA PERSONA ADXUDICATARIA

La persona adxudicataria vei tener los drechos siguientes:

• Usu de suelu públicu pal desenvolvimientu de la súa actividá.  
• Mantenimientu de las instalaciones pa la súa explotación.  
• Indemnización por supresión de la prestación siempre que se faga por causas ayenas a la persona adxudicataria ya nun s'acabara la ocupación.  
• A que se-y facilite enganche d'augua ya d'enerxía eléctrica ya a que s'instalen contenedores pa la recoyida de residuos.

15.- OBLIGACIONES DE LA PERSONA ADXUDICATARIA

• Atender el pagu de los impuestos, drechos ya tasas, tanto estatales cumo de los conceyos ya/ou autonómicas, drechos ya tasas que graven l'exerciciu de l'actividá obxectu d'esta adxudicación.  
• La persona adxudicataria vei ser la responsable exclusiva del cumplimientu de las disposiciones laborales respectu al personal qu'emplee pal desenvolvimientu de l'actividá de bar.
• Mantener l'asitiamientu nel que s'ubique la barra del bar ya las súa redolada nas condiciones hixénicas adecuadas, debiendo revertir esti espaciu al Conceyu nas mesmas condiciones nas que se recibíu.
• Vixilar el bar ya adoptar las mididas necesarias pa evitar daños nas súas instalaciones, roubos ou actos vandálicos. COFECA nun vei asumir niuna responsabilidá nesti sentíu.
• Exercer por si mesmu/a l'actividá ensin que pueda exercitar la cesión a terceiros ensin la conformidá expresa de COFECA.
• Cumplir cono dispuesto na normativa relativa a la seguridá ya la hixene no trabayu, amás de a lo dispuestos na normativa sanitaria ya de consumu ya tresporte de bebidas, en concreto, a lo dispuesto no RD 1010/1985, de 5 de xunu, pol que se regula l'exerciciu de modalidades determinadas de venta fuera d'un establecimientu comercial permanente ya na Lei del Principáu d'Asturias 11/2002, de 2 del mes muertu, de los consumidores ya usuarios.
• Tar en posesión de facturas ya albaranes qu'acrediten la procedencia de la mercancía ya presentalos a requerimientu de l'autoridá competente si asina se demanda.
• Instalar un cartel con indicación de la lista de precios de los productos nun sitiu visible dafeitu pa las veceras ya veceiros, nél, incluiráse l'IVA ya cualquier outru impuestu que pida la normativa en vigor.
• Usar envases de material desechable.
• Disponer ya dispensar bebidas debidamente embotelladas, identificadas mediante etiquetas, de manera qu'existan garantías en cuanto a la procedencia d'una industria autorizada sanitariamente.

16.- EXTINCIÓN DE L'AUTORIZACIÓN.

Serán causas d'extinción las siguientes:

• Que sobrevengan circunstancias qu'esixan, por razones d'interés públicu, el fin de la ocupación demanial.  
• L'usu de las instalaciones pa usos diferientes a los autorizaos.
• Facilitar bebidas alcohólicas a menores.
• La cesión de l'autorización.
• El cierre inxustificáu de las instalaciones.

Accesu dende esti enl.laz al anunciu en pdf. Inclúi modelu de declaración responsable ya ufierta económica.
Accesu dende esti enl.laz pa descargar el modelu de declaración responsable ya ufierta económica en formatu odt (OpenOffice Writer).