Ente'l 22 ya'l 26 d'outubre, Cangas celebra una sumana chena d'actividades relacionadas cona salú pa conmemorar el Día Internacional de las Personas Mayores.
Las actividades empicipiarán el l.lunes 22 d'outubre con un taller de primeiros auxilios ya una charla médica relacionada cona dieta ya l'exerciciu. L'accesu a la charla, que se celebrará a partir de las 17:00 nel Auditoriu de la Casa la Cultura "Palaciu d'Oumaña" yá l.libre, pero pa participar nel taller, que se fairá n'horariu de mañena, a las 11:30 horas, hai qu'apuntase anantes no Centru Social ou nas dependencias de los Servicios Sociales.

El martes 23, la xornada siguirá cona celebración d'un bingu saludable, que se celebrará a partir de las 18:00 horas no Centru Social de Personas Mayores de Cangas.  El premiu del bingu vei ser una cesta de fruta.

El miércoles 24 el día será completu ya incluirá  un taller de cocina saludable pa nenos/as no CP Alejandro Casona, a las 10:00 horas, ya  dúas obras de teatru, una a cargu del Grupo de Teatro de Personas Mayores de la Escuela de Salud de Tineo, que  presenta Teatro divertido y saludable ya outra a cargu del Grupo de Teatro "El Carmen", que presenta ¡Ay, Antón, que el gallo ya no canta!
El xueves 25 la xornada vuélvese más festiva, empicipia a las 14:00 con una xanta d'harmandá ya sigue con un bail.le amenizáu por Diego no Centru Social de Cangas. El plazu p'apuntase a la xanta acaba'l 22 d'outubre. P'apuntase haberá qu'abonar el preciu del menú: 10 euros.

El vienres 26, p'acabar la xornada de manera saludable, fadráse, a partir de las 10:00 horas, una marcha por un millón de pasos con participantes de tódalas edades ya condiciones. L'itinerariu de la marcha sedrá: Cangas - San Tisu- La Imera - Cangas. Durante'l traxectu, repartiránse zumos ya frutas ya, n'acabando, las personas participantes celebrarán la xornada con una bona macedonia de frutas no Centru Social de Cangas. Las inscripciones pa la marcha han fadese en Servicios Sociales.

 La conceyala de Servicios Sociales, Carmen López, anima a tódalas personas mayores de Cangas a participar nestas xornadas, destinadas, principalmente, a crear ambientes de desenvolvimientu ya ociu saludable pa las personas mayores; igualmente, recuerda a toda la ciudadanía la importancia de las aportaciones que los mayores fan al conxuntu de la comunidá ya recalca la necesidá de dignificar ya revalorizar esas aportaciones importantísimas.