Ente'l 22 ya'l 26 d'abril, Cangas celebra la súa XVIII Sumana del Teatru.

Abre esta sumana dedicada a las artes escénicas Los cuernos de Antón (alta sociedad), de Teatro Suroccidente. Una obra costumista que critica con humor la hipocresía ya las apariencias,  onde, amás, afloran las miserias personales ya las de las relaciones de pareya nun contextu distendíu, simpáticu ya amenu.

El martes, Mar Rojo Teatro organiza la primera de las propuestas infantiles, El aire de las castañas, una propuesta qu'incide na importancia de la tresmisión interxeneracional ya nel vínculu afectivu importantísimu ente buelos ya nietos

El miércoles, Teatro Kumen ocupa las tablas del Toreno cona comedia Miles gloriosus, obra clásica de Plauto reinterpretada pola compañía qu'asegurará risas ya momentos bonos mediante la ridiculización d'esti personaxe hiperbolizáu.

El xueves, el Teatru Toreno vuelve ponese a disposición del públicu más pequenu con un espectáculu de Producciones Quiquilimón, Una luna entre dos casas, una obra que nos recuerda la importancia de la comunicación ya la expresión personal, incluyendo nesti camín manifestaciones artísticas relacionadas cona expresión del yo, cumo la música, ya sobrayando, principalmente, la importancia de l'amistá.

Pa cerrar una sumana espectacular, chegará Teatro Contraste con Una pareja (qué es mío y qué es tuyo), retratu de dúas pareyas onde abondarán las reflexones sobre la crisis provocada pola l.luita ente la busca de la identidá individual ya la pareya.

La conceyala de Cultura, Carmen Riesco Combarro, anima a la ciudadanía a participar d'esta ufierta cultural rica ya variada con propuestas pa tolos gustos.