Laboral Cineteca yía un proxectu promovíu pola Conseyería d'Educación ya Cultura, al traviés de la Sociedá Pública de Xestión ya Promoción Turística ya Cultural del Principáu d'Asturias ya, con él, pretende estimulase'l conocimientu cinematográficu.

Empicipia esti ciclu n'A Veiga, Cangas del Narcea, Tinéu, Sobrescobiu, Villaviciosa ya Cangues d'Onís.

Los conceyos que participan na iniciativa van poder proxectar gracias a esta colaboración ente organismos públicos películas de cultu, procedentes en muitos casos de festivales internacionales, la mayoría d'el.las premiadas nestos mesmos certámentes. Las películas van ofrecese en versión orixinal subtitulada al castellanu ya la entrada a la proxección vei ser de baldre.

Las películas qu'inaugurarán Laboral Cineteca son Virgin Mountain (Corazón gigante), de Dagur Kári; The fencer (La clase de esgrima), de Klaus Härö; El rey borni (El rey tuerto), de Marc Crehuet ya Theeb (Lobo), de Naji Abu Nowar.

Las temáticas son variadas, dende un repasu pol procesu de madurez con contextos ya ángulos mui diferientes ente sí no casu de Virgin Mountain, El rey borni ou Theeb a una trama policíaca en The fencer.

Próximamente, ampliaráse ya complementaráse la información relativa al cartel de películas ya a los espacios destinaos al proxectu.

Ente tanto ya non, la conceyala de Cultura, Mª del Carmen Riesco Combarro, valora mui positivamente la participación de Cangas nun proxectu col espíritu d'aveirar la cultura, nesti casu cinematográfica, a las zonas más desfavorecidas no qu'a esti tipu d'iniciativas se refier, oriente ya occidente; ya siéntese arguyosa de formar parte d'un programa de cine itinerante que rescata l'espíritu de democratización de la cultura que preconizaran las Misiones Pedagóxicas ente 1931 ya 1936.