DÍA INTERNACIONAL ESCONTRA LA VIOLENCIA PA CONAS MUYERES

Dende’l Centru Asesor de la Muyer de Cangas del Narcea (con ámbitu d’actuación nos conceyos de Tinéu, Ayande, Ibias ya Degaña) ya, dientro de las súas actividades de sensibilización ya prevención, vienen organizándose nos meses d’outubre ya los santos unos talleres dirixíos al alumnáu de 4u cursu d’Educación Secundaria Obligatoria nos que se tratan aspectos relacionaos cona rialidá que padecen las muyeres que son víctimas de maltratu.

En Cangas del Narcea trátase de la edición cuarta ya no IES de Tinéu feíxose esti cursu académicu por primer vez.

Los carteles que s’exponen son los feitos no IES de Cangas del Narcea, dao que los del IES de Tinéu yá s’exponen na Casa la Cultura de Tinéu. Fudamentalmente pretende sensibilizase a la población sobre esti problema grave ya alcontrar cono alumnáu las causas verdaderas ya las manifestaciones d’esta violencia pa cuntar conas claves pa desactivala.

L’actividá tien l’itinerariu siguiente:

• El 4 d’outubre de 2011. Regunión conos/as tutores/as de los grupos pa la puesta en común ya disponibilidá de colaboración na actividá.
• Sumana del 17 al 21 d’outubre de 2011. Na hora de tutoría na que correspuenda a cadagunu de los grupos l’abogada del Centru Asesor de la Muyer de Cangas del Narcea (profesional responsable de la xestión de los casos de violencia de xéneru na nuesa zona) acudiría a esplicar el desenvolvimientu de l’actividá al alumnáu, amás d’a entregar el material cono que trabayar (trátase d’una cartulina de color malva cona que se fan unos carteles baxo’l lema: Mitos ya rialidades de la violencia de xéneru). En cada aula fórmanse grupos pequenos de 4/5 personas cadagunu (yá interesante que los grupos sean mestos).
• Las tres sumanas siguientes (24 al 28 d’outubre, 31 al 4 ya 7 al 11 de los santos del 2011) l’alumnáu trabayaría na actividá na hora de tutoría reflexonando sobre’l tema propuestu, dando respuesta a las cuestiones planteadas ya fadiendo’l cartel que tengan diseñáu.
• La sumana del 14 al 18 de los santos de 2011 l’abogada del Centru Asesor de la Muyer acude outra vez nel horariu de tutoría pa faer una reflexón sobre’l trabayu feitu por tódolos grupos ya pa poner en común nel aula los carteles ya outros materiales que pudieran aportar: vídeos, música relacionada cono tema, fotos, noticias de prensa, etc.
• P’acabar, el día 25 de los santos de 2011 expónense no patiu del IES ou n’outru sitiu visible los trabayos feitos pol alumnáu ya premiase al grupu d’alumnos/as que fixeran el cartel más representativu sobre’l tema propuestu.

Esti día faise la entrega del premiu no Salón d’Actos del IES buscando un horariu nel que todu l’alumnáu que participara na actividá pueda acudir.

Nel actu d’entrega tratamos de sintetizar ya aportar unas conclusiones sobre lo reflexonao respectu al problema de la violencia de xéneru.

Tamién se reparten l.lazos de color malva ente las personas que quieran colocáselos cumo símbolu de rechazu a esti tipu de violencia.

CUESTIONES que puede plantear la reflexón del alumnáu:

1. ¿Qué yá violencia de xéneru? ¿Por qué se denomina asina? ¿En qué se diferiencia de la violencia doméstica?
2. ¿Qué normas abordan ou regulan la violencia de xéneru? ¿Conoces los antecedentes sociolóxicos ya estadísticos que l.levanon a promulgar una lei que trate específicamente esti problema?
3. ¿Crees que la violencia de xénero se da ente personas de la túa edá ou xeneración? Se yá asina, ¿por qué crees que pasa?
4. ¿Qué características crees que definen a un home qu’exerce violencia sobre una muyer ya qué lu diferiencia d’outru home que nun lo fai no marcu de la relación de pareya?
5. ¿Qué características crees que presenta una muyer qu’yá víctima de violencia ya outra mujer que nun lo yá?

Yá conocida la necesidá de la prevención no problema de la violencia ya d’educar n’igualdá, entós:

1. ¿Qué valores crees qu’yá preciso fomentar na educación ya especialmente a tener en cuenta na túa relación de pareya?
2. Se tuvisti oportunidá de ver ou escuitar dalguna campaña de sensibilización escontra la violencia de xéneru coméntala no tou cartel.
3. ¿Qué organismos a nivel estatal, autonómicu ya local tán implicaos na l.luita escontra la violencia de xéneru?
4. ¿Conoces cantares, películas, curtios ou l.libros qu’aborden esti problema?
5. Busca una imaxe, debuxu ou fotografía que muestre’l tou rechazu hacia la violencia pa conas muyeres ya colócalos no cartel que veis trabayar.

Se en dalgún momentu cualquier tutor ou tutora necesita contactar cona persona que promueve esta actividá puede faelo vía teléfonu ou corréu electrónicu a:

MARÍA JOSÉ FERNÁNDEZ GARCÍA
L.LETRADA DEL CAM DE CANGAS DEL NARCEA
TELÉFONU 676 49 00 09 – 985 81 38 12
EL MERCÁU, S/N
CANGAS DEL NARCEA
amujer@ayto-cnarcea.es

EXPOSICIÓN NA CASA LA CULTURA DEL CONCEYU DE CANGAS DEL NARCEA (DEL 17 AL 30 D’ABRIL DEL 2012)

Carteles feitos pol alumnáu de 4u d’ESO del IES de Cangas del Narcea con motivu del 25 de los santos del 2011, Día internacional escontra la violencia pa conas muyeres.