El Centru Asesor de la Muyer de Cangas del Narcea yá un recursu dende’l que se presta información ya asesoramientu xurídicu de baldre a las muyeres residentes nos conceyos de Cangas del Narcea, Ibias, Degaña, Ayande ya Tinéu (aquel.los que forman parte del aria sanitaria II del Principáu d’Asturias).

Amás, yá un recursu especializáu en materia de violencia de xéneru qu’acompaña l’itinerariu de las muyeres víctimas de la violencia de xéneru al traviés de l’alministración, actuando cumo responsable de casu ya fadiendo’l siguimientu de las mididas que, pal apoyu ya acoyida hasta la súa recuperación integral, vayan poniéndose en marcha nas distintas alministraciones públicas.

Cumo xestora ou responsable de casu, la intervención de l’abogada del Centru Asesor de la Muyer vei destinada a garantizar el plenu exerciciu de los drechos que la víctima tien recoyíos na lei, por eso, el sou trabayu consiste n’informar, asesorar, coordinar ya faer el siguimientu de los procedimientos xudiciales ya alministrativos. Pal desenvolvimientu d’esti l.labor actúa de forma coordinada cono restu de los organismos qu’intervienen na atención de las víctimas: Turnu d’Oficiu de Violencia de Xéneru, Serviciu Públicu d’Empléu, Serviciu de Salú del Principáu d’Asturias, Servicios Sociales, Rede de Casas d’Acoyida, fuerzas ya cuerpos de seguridá del estáu ya Policía del Conceyu.

Dende’l Centru Asesor de la Muyer tamién se fai un l.labor de prevención ya sensibilización escontra la violencia pa conas muyeres al traviés de xornadas ya talleres que se ponen nos centros educativos (IES de Cangas del Narcea ya Tinéu), tamién d’actividades promovidas polas asociaciones de muyeres ya no marcu de programas que dependen de l’alministración autonómica ya local (Tiempu propiu, Muyer rural, actividades de conmemoración del 25 de los santos).

Contactu ya localización

Puede contactase con María José Fernández García, abogada del Centru Asesor de la Muyer’i Cangas del Narcea, por vía telefónica no númaru 985813812, por corréu electrónicu na dirección amujer@ayto-cnarcea.es ou acudiendo a las dependencias de la Casa Conceyu de Cangas del Narcea, El Mercáu, s/n.

Horariu
 

L’horariu d’atención al públicu yá de l.lunes a vienres de 9:00 a 14:00 horas.