INFORMACIÓN YA PARTICIPACIÓN CIUDADANA

Drechu a la información urbanística

1.- Entiéndese por información urbanística toda la información disponible nas alministraciones públicas, baxo cualisquier forma d’expresión ya en todu tipu de soporte material, referida a las ferramientas de planeamientu ya xestión urbanística ya a la situación urbanística de los terrenos, tamién a las actividades ya mididas que puedan afectar a la mesma (art. 21.1 Textu refundíu d’ordenación del territoriu ya urbanismu. Decretu 1/2004 de 22 d’abril; BOPA 27/04/2004).
Amás, ya a los efectos del párrafu anterior, van entendese incluidas las ferramientas d’ordenación del territoriu.

2.- La Casa Conceyu vei adoptar las mididas necesarias pa garantizar l’accesu a la información urbanística de la súa competencia a tódalas personas, físicas ya xurídicas, sin necesidá de qu’acrediten un interés determináu ya con garantía de confidencialidá sobre la súa identidá sin aplicación d’outros límites que los qu’establezan las leis (art. 21.2 TROTU).

3.- La información urbanística tien de solicitase énte la Casa Conceyu pa facilitase, debiendo ésta pronunciase sobre la solicitú no plazu d’un mes. La súa obtención respectu a las ferramientas d’ordenación del territoriu ya de planeamientu ya xestión urbanísticos requier que culminara la súa tramitación en vía alministrativa.

4.- Reconozse especial prioridá no accesu a la información urbanística a los propietarios ou titulares d’outros drechos ya a los afectaos de cadaguna de las actuaciones urbanísticas, amás d’a las entidades representativas de los intereses afectaos polas mesmas (art. 21.3 TROTU), reduciéndose a quince días el plazu de que dispón l’Alministración Pública pa facilitar la información urbanística.

Licencia urbanística

La licencia urbanística yá l’actu alministrativu de carácter regláu mediante’l qu’alquieren efectividá las posibilidades de parcelación, edificación, ocupación, aprovechamientu ou usu urbanísticu relativas a un suelu ou a un subsuelu determinaos, previa concreción de lo establecío al respectu de las leis, del planeamientu ya de la demás normativa territorial ya urbanística (art. 228.1 TROTU).

Actos suxetos a licencia urbanística

1.—Sin perxuiciu de cualisquier outras autorizaciones que foran precedentes con arreglu a la lexislación sectorial específica que resulte aplicable, tarán supeditaos a la obtención de licencia previa, a efectos de lexislación urbanística, los actos d’edificación ya usu del suelu, tales cumo las parcelaciones urbanísticas, los movimientos de tierra, las obras de planta nueva, la modificación d’estructura o aspectu exterior de las edificaciones existentes, el primer usu de los edificios ya la modificación del usu de los mesmos, el baltu de construcciones, la colocación de carteles de propaganda visibles dende la vía pública ya los demás actos que siñalen los planes, normas ya ordenanzas urbanísticas, nun siendo que se faigan en cumplimientu d’órdenes d’execución de l’autoridá competente del Conceyu. Cuando los particulares edifiquen ya faigan usu del suelu en terrenos de dominiu públicu, vei pidise tamién licencia, con independencia de las autorizaciones ou concesiones que sea pertinente otorgar por parte del ente titular del dominiu públicu (art. 228.2 primer párrafu TROTU). La falta d’autorización ou concesión ou la súa denegación van impidir al particular obtener licencia urbanística ya al órganu competente otorgala.

2. — En particular, tán sometíos a la obtención de licencia previa los actos qu’aiquí se relacionan, sea la que sea la naturaleza l'usu del suelu ande se quieran faer:

a) Las parcelaciones urbanísticas.

b) Los movimientos significativos de tierras en cualquier clas de suelu: desmontes, explanaciones, excavaciones ya terraplenes; las obras d’instalación de servicios públicos, las d’execución de viales ya, en xeneral, las obras puntuales d’urbanización, nun siendo cuando estos actos foran detallaos ya programaos cumo obras a executar nun proxectu d’urbanización definitivamente aprobáu ou d’edificación que disponga de licencia otorgada.

c) Las obras d’edificación, amás de las de construcción ya implantación d’instalaciones de toda clas de planta nueva, ente las que van incluise las obras de construcción d’infraestructura civil, cumo presas, banzaos, balsas, puertos, diques, defensa ya corrección de cálceres públicos, viariu públicu ya priváu, etc.

d) Las obras de construcción ou instalación de cierres, muros ya val.láu de fincas.

e) Las obras ya los usos que se faigan de manera provisional.

f) Las obras ya usos industriales ou terciarios que se faigan anticipadamente.

g) Las instalaciones ya construcciones de carácter temporal destinadas a espectáculos ya actividades recreativas.

h) La instalación ou ubicación de casas prefabricadas ya instalaciones parcidas, provisionales ou permanentes.

i) Las obras d’ampliación, reforma, modificación ou rehabilitación qu’afecten a la estructura, l’aspectu exterior ou la disposición interior d’edificios; las construcciones ya instalaciones de toda clase yá existentes, cualisquier que sea’l sou alcance, la súa finalidá ya’l sou destín.

j) El primer usu ou ocupación ya la modificación ou cambiu d’usu de los edificios ya instalaciones en xeneral.

k) L’esbarrumbe total ou parcial de las edificaciones ya las construcciones.

l) La colocación de carteles de propaganda visibles dende la vía pública.

m) Las actividades extractivas de minerales, líquidos ya outros.

n) Las actividades de vertíos no subsuelu ya de depósitu de residuos, escombros ya materiales en xeneral que sean ayenos a las características del terrén ou de la súa explotación natural, nun siendo las previstas nos proxectos d’urbanización.

ñ) L’usu del vuelu sobre las edificaciones, construcciones ya instalaciones de toda clas existentes.

o) Las instalaciones subterráneas dedicadas a aparcamientu, actividades industriales, mercantiles ou profesionales; a los servicios públicos ou a cualisquier outru usu ou actividá qu’afecte al subsuelu.

p) La tirada d’árboles que constituyan masa arbórea, espaciu de monte, arboleda ou parque, amás del baltu d’exemplares que tengan interés botánicu ou ambiental especial ya tean especialmente incluíos no planeamientu.

q) La instalación de linias eléctricas, telefónicas ou outras parcidas ya la colocación d’antenas ou dispositivos de telecomunicaciones de cualquier tipu.

r) Las obras d’apertura de caminos ya accesos a parcelas en suelu non urbanizable.

s) En xeneral, tódolos demás actos d’usu del suelu ou del subsuelu nel que s'esixan el planeamientu territorial ou urbanísticu ou las ordenanzas del Conceyu, por suponer una mayor intensidá d’usu, un usu privativu ou un usu anormal ou diferente del destín agrícola ou forestal de los terrenos.

Namás van conceptúase cumo obras menores aquel.las de técnica simple ya entidá constructiva ya económica escasa que nun supongan alteración del valume, del usu obxectivu de las instalaciones ya servicios d’usu común ou del númaru de viviendas ya locales, nin afecten al diseñu exterior, a la cimentación, a la estructura ou a las condiciones d’habitabilidá ou seguridá de los edificios ya instalaciones de todas clases. En niún casu van entendese cumo tales las parcelaciones urbanísticas, los cierres de muru de fábrica de cualisquier clas, las intervenciones n’edificios declaraos bienes d’interés cultural ya catalogaos, los movimientos grandes de terrenos ya’l baltu masivu d’arboláu (art. 228.2, segundu párrafu).

Actos non suxetos a licencia urbanística

• Las obras públicas del Conceyu, incluidas las d’urbanización feitas polos particulares en cumplimientu de la normativa ya’l planeamientu urbanísticu, amás de las executadas polos concesionarios de servicios públicos locales pa la prestación del serviciu concedíu, entenderánse autorizadas pol alcuerdu d’aprobación del proxectu, acreditándose anantes no expediente’l respetu al planeamientu en vigor ya a la normativa urbanística (art. 228.4 TROTU). Esti alcuerdu vei tar suxetu a los mesmos requisitos que la licencia urbanística a efectos de normativa territorial ya urbanística, sin perxuiciu de lo dispuesto na lexislación de réxime de los conceyos.

• Amás de los actos excepcionaos nel apartáu anterior, nun requieren licencia urbanística los actos que se relacionan aiquí:

a) Los actos d’usu del suelu, construcción ya edificación que sean promovíos polos conceyos no sou términu propiu.

b) Las obras d’urbanización feitas polos particulares en cumplimientu de la normativa ya’l planeamientu urbanísticu, cuando foran detalladas ya programadas cumo obras a executar nun proxectu d’urbanización definitivamente aprobáu ou d’edificación que disponga de licencia otorgada.

c) Los actos d’usu del suelu ya del subsuelu que sean expresamente eximíos de licencia urbanística pola lexislación sectorial que sea aplicable.

Alcance xeneral de la intervención municipal.

1. —Las licencias van otorgase con carácter regláu d’alcuerdu conas previsiones de la ordenación territorial ya urbanística. A talos efectos, la ordenación aplicable vei ser la vixente a la fecha de presentación de la solicitú, sin perxuiciu de la suspensión de licencias que pudiera dictase. No casu de suspensión de licencias:

a) Se la suspensión de licencias se fixera espuéis del plazu previstu na lexislación pa resolver, la resolución extemporánea axustaráse al réxime vixente no momentu de la solicitú.

b) Se la suspensión de licencias se fixera dientro del plazu previstu na lexislación pa resolver, la resolución axustaráse al réxime vixente tres l’aprobación del planeamientu nuevu que motivóu la suspensión de licencias.

2. —Cuando la ordenación aplicable presente imprecisiones ou suscite dudas na súa interpretación, las decisiones anteriores de la Casa Conceyu actuante van tener fuerza interpretativa vinculante n’atención a las esixencias del principiu d’igualdá.

3. —Las licencias van otorgase deixando a salvu’l drechu de propiedá ya sin perxuiciu de terceiru.

4. —La Intervención del Conceyu comprométese estrictamente a la comprobación de la integridá formal ya la suficiencia legal de la solicitú presentada, incluida la documentación que l’acompañe ya con arreglu a la que deba ser en desenvolvíu l’actu suxetu a licencia, amás d’a l’habilitación ou competencia profesional del autor ou los autores del proxectu técnicu que resulte, no sou casu esixible, ya a la conformidá ou non de lo proxectao ou pretendío na normativa d’aplicación pertinente.

La Intervención del Conceyu nun alcanza a la garantía de seguridá ya calidá de la obra, que s’axustará a las previsiones de la lexislación d’ordenación de la edificación.

Solicitú ya documentación esixible

1. —Las solicitudes de licencia urbanística tienen de presentase acompañadas de:

a) Documentación suficiente qu’identifique al solicitante, l’actuación d’usu del suelu pal que se solicita, con indicación del sou usu específicu cuando se refiera a edificaciones, construcciones ou instalaciones.

b) Las autorizaciones concurrentes ou informes sectoriales esixíos con carácter previu pola lexislación que resulte aplicable ya, en todu casu, pola normativa mediuambiental ou de protección del padremuñu cultural, amás de pola autorización ou concesión demanial correspondiente cuando l’actu pretendíu implique l’aprovechamientu especial ou l’usu privativu del dominiu públicu nos términos establecíos pola lexislación reguladora del padremuñu de las alministraciones públicas.

c) Proxectu técnicu suscritu pol facultativu competente pa ostentar la condición de proxectista conforme a la lexislación sobre ordenación de la edificación. Nun vei requerise proxectu nas obras nas que, conforme a la mesma lexislación, nun sea necesario, d’estos casos tratará l’apartáu siguiente.

2. —Las solicitudes de licencia urbanística que, conforme a la lexislación d’ordenación de la edificación, nun necesiten proxectu técnicu van tener qu’acompañase d’una memoria descriptiva de las actividades suxetas a licencia, na que se definan ya describan con exactitú los usos nas súas caracacterísticas urbanísticas ya las condiciones de seguridá, salubridá ya ornatu adecuadas al sou asitiamientu. El profesional autor de la documentación técnica na que se fundamente la solicitú de la licencia vei responder, a los efectos que procedan legalmente, de la exactitú ya veracidá de los datos de carácter técnicu consignaos nel.la.

Rieglas referidas a la emisión d’informes

• En todu procedimientu de concesión de licencia yá preceptiva la emisión d’informes técnicos ya xurídicos polos servicios correspondientes de la entidá otorgante ou, no sou casu, de las oficinas urbanísticas territoriales (art.229.5 primer párrafu TROTU). En cualisquier casu, los informes técnicos van ser redactaos pol personal tituláu competente, en relación conas atribuciones otorgadas pola lexislación d’ordenación de la edificación.

• Los informes técnicos ya xurídicos a los que se refier l’apartáu anterior tienen de considerar en todu casu l’adecuación del proxectu a la legalidá territorial ya urbanística ya a las demás normas que resulten aplicables, con especial consideración de las relativas a la evaluación del impactu ambiental ou territorial, conservación del padremuñu cultural ya promoción de l’accesibilidá ya supresión de barreras.

• Cuando la normativa sectorial imponga la necesidá d’un informe d’organismos distintos al ente local énte’l que se solicite la licencia urbanística ésti vei faese conforme a lo dispuesto en dicha normativa acerca del carácter del mesmu. N’ausencia de previsión expresa al respectu, la falta d’emisión en plazu vei entendese equivalente a un informe favoratible.

• Cuando los informes sectoriales que deban incorporase al expediente tengan de ser emitíos por órganos ou organismos pertenecientes ou vinculaos a la mesma entidá local, l’órganu que tenga de resolver la licencia solicitarálos a un tiempu nun solu actu ya por una sola vez.

• Cuando sean preceptivos informes ou autorizaciones d’outras alministraciones públicas que deban obrar no expediente únicu d’otorgamientu de la licencia urbanística ya los mesmos nun s’axunten cona solicitú, remitiráse copia de la solicitú a dichas alministraciones pa que resuelvan no plazu previstu na normativa sectorial ou, no sou defectu, no máximu de dous meses, trescurríu esti plazu los informes pueden entendese favoratibles ya las autoridades concedidas, nun siendo que la lexislación aplicable estableza procedimientos ou efectos diferentes.

Silenciu alministrativu

1. —Las licencias van entendese obtenidas por silenciu positivu en pasaos los plazos ya cumplidas las condiciones establecidas pola lexislación de réxime del Conceyu ou cualquier outra que sea d’aplicación, sin que se notificara la resolución. En niún casu van poder alquirise por silenciu facultades en contra de las prescripciones de las leis, planeamientu territorial ya urbanísticu ya demás normativa urbanística (art. 229.7 TROTU) ou sectorial que sea aplicable.

2. —Así a todo lo dispuesto no apartáu anterior, las solicitudes de licencia urbanística deben entendese desestimadas por silenciu alministrativu nos supuestos siguientes:

a) Cuando afecten a bienes de dominiu públicu.

b) Cuando, debiendo dictase resolución única con outras licencias ou autorizaciones, éstas han d’entendese desestimadas conforme a la súa lexislación específica.

c) Cuando afecten a bienes inmuebles incluíos en dalguna de las categorías de protección establecidas na lexislación de padremuñu cultural ou no sou entornu delimitáu.

Plazos d’execución

1.— Los actos d’usu del suelu ou del subsuelu amparaos por licencia urbanística deben faese dientro de los plazos de principiu, fin ya interrupción máxima que s’establezan nas ferramientas de planeamientu ya xestión urbanística que sean aplicables ya na propia licencia. En casu de que nun se determine expresamente, cuando supongan la realización d’obras, entenderánse otorgadas baxo la condición de la observación de seis meses pa emprincipiar, tres meses pa la interrupción ya dous años p’acabar, a cuntar dende la notificación del otorgamientu de la licencia ou, no sou casu, dende l’autorización por silenciu.

2.—La ampliación de plazos de principiu, interrupción ya fin vei axustase a lo establecío na normativa reguladora del procedimientu alministrativu común ya vei requerir que los actos d’usu del suelu ou del subsuelu amparaos por licencia urbanística se dispongan conforme a la normativa territorial ya urbanística vixente no momentu de solicitase la prórroga.

3.—La prórroga de los plazos de principiu ya interrupción máxima supón l’ampliación automática del plazu de finalización pol mesmu tiempu pol que se conceden.

Obligaciones económicas

• Tasa por concesión de la licencia urbanística, con arreglu a la correspondiente ordenanza fiscal.

• Tasa por ocupación de terrenos d’usu públicu con mercancías, materiales de construcción, escombros, canciel.las, puntales, andamios ya outras instalaciones análogas, cuando sea necesario ocupar la vía pública pa executar las obras ou instalaciones proxectadas.

• Impuestu sobre construcciones, instalaciones ya obras, en base a la ordenanza fiscal correspondiente.