Las I Xornadas d’asociacionismu de Cangas del Narcea eichánonse a andar el l.lunes 5 de los santos conas conferencias primeras de la mano del Grupo Ecologista Cangués Azor (GECA), qu’impartíu la ponencia “27 años de l’asociación GECA”, na que se feixo un recorríu pola historia de l’asociación ya los proxectos desenvolvíos.

Nel actu d’inauguración, nel que tuvienon presentes la Conceyala de Cultura, Marta Fernández; el Presidente de Cruz Roja en Cangas del Narcea, Sandalio Gurdiel; varios representantes de las asociaciones participantes, las organizadoras de las xornadas: Rosa Caballero, técnica de la Oficina d’Información a la Mocedá, ya Zaida Antomil, técnica del Centru de Voluntariáu Aria II, puxenon de manifiestu la intención de qu’estas xornadas seyan un puntu d’alcuentru añal ente las asociaciones diferentes del conceyu.

Amás, abríuse al públicu la exposición conxunta que fixenon las cuatro asociaciones participantes nas xornadas na Casa la Cultura, no Palaciu d’Oumaña, cono obxectivu de mostrar la función que tienen ya las actividades que fan cadaguna d’el.las.

“Tres décadas pa la conservación ya divulgación de la naturaleza canguesa” yá la propuesta de GECA, qu’al traviés de las súas publicaciones ya fotografías enseña la evolución de los programas desenvolvíos durante los sous 27 años n’activo.

Los encargaos de siguir conas ponencias son Tous pa tous, sociedá canguesa d’amantes del país; conos que la cita yá pal miércoles día 7, a las 19:30. Esta asociación canguesa veterana tamién tien el sou espaciu na sala d’exposiciones cona muestra Documentación histórica recuperada pol Tous pa tous, na que s’exhibe material históricu recuperáu pola asociación, cumo l.libros, publicaciones periódicas, fotografías ya un debuxu curiosu de la vil.la de Cangas del Narcea de 1771.

El toque más natural de la exposición ponlu l’Asociación micológica Senderuela cona muestra Setas típicas de la zona de Cangas del Narcea, na que pueden vese exemplares de los tipos diferentes de setas que pueden topase nos montes del conceyu.

La última de las asociaciones participantes nas xornadas yá’l Grupo de montaña Piélago, qu’ufierta la exposición fotográfica “Cona cámara na mochila”, un recorríu breve polos paraxes naturales visitaos pol grupu durante los sous 20 años de vida.

Precisamente, l’Asociación micológica Senderuela ya’l Grupo de montaña Piélago van ser los encargaos de cerrar las xornadas con dúas ponencias, que van faese’l vienres 9 de los santos, a las 19:00 ya a las 20:00, respectivamente.

Imágenes