El Conceyu de Cangas del Narcea puxo en marcha un cursu de monitor/a d’actividades de tiempu l.libre, que se ta fadiendo de l.lunes a vienres de 9:00 a 15:00 nel Auditoriu de la Casa Conceyu dende’l 25 de xunu ya hasta’l 25 de santamarina. L’asociación Los Glayus yá la encargada de poner el cursu, que cunta con 230 horas lectivas, de las que 150 son teóricas ya 80 prácticas.

A las clases asisten 25 personas d’edades diferentes que n’acabando’l mes de teoría ya las prácticas van obtener una titulación oficial del Principáu d’Asturias que los vei convertir en monitores/as de tiempu l.libre.

Beatriz Álvarez, profesora del cursu, desplica que trátase d’un taller que val pa deprender ya entrenar habilidades nuevas ya qu’amás yá mui participativu ya dinámicu “fademos cousas vivenciales, al traviés de xuegos vamos construyendo la teoría”. En xeneral, “l’alumnaú busca convertise en monitor, complementar los sous estudios ou namás deprender cousas nuevas sin más”, asegura la profesora.

Isabel Valdés, alumna, comenta que’l sou obxectivu a la hora de formar parte del cursu era “complementar la mía formación, porque trabayo con nenos ya yá necesario reciclase”. Outra alumna del cursu, Elda Gurdiel, asegura qu’yá un cursu interesante, porque otorga puntos que contabilizan nas oposiciones de maxisteriu. Las dúas tán d’alcuerdu en que’l taller yá “mui divertíu ya amenu” ya en que deprendes muitos xuegos ya actividades “que tán bien pa faer conos nenos”.

La creatividá ya la diversión son ingredientes básicos del cursu de monitor/a de tiempu l.libre, con todo, Beatriz Álvarez apunta: “l’obxectivu yá apostar por una educación basada en valores ya, pa consiguilo, la ferramienta qu’usamos yá’l xuegu ya’l teatru, pero’l fin nun yá namás la diversión”.

N’acabando las 150 horas teóricas, l’alumnáu tendrá de faer las 80 horas prácticas, pudiendo escoyer ente las ufiertadas pola Casa Conceyu, la propia asociación Los Glayus ou las empresas qu’el.los mesmos busquen.
 

Imágenes