Las personas usuarias han l.levar máscara, l.lavase las manos con xel desinfestante ya tomase la temperatura antias d'entrar nas dependencias del Conceyu.

El Conceyu de Cangas del Narcea vei abrir al públicu tódolos servicios del Conceyu aplicando un protocolu sanitariu estrictu. Dende güei, volvíu l'atención presencial n'horariu de 9 a 14 horas no Centru de Dinamización Tecnolóxica del Conceyu (CDTL), la Biblioteca, l'Archivu, la Oficina Moza, el Serviciu de Normalización L.lingüística, l'Aria de Cultura ya los servicios deportivos, esos últimos yá en funcionamientu ya ampliando prestaciones a partir del 15 de xunu cona apertura del polideportivu ya, a final de mes, cona apertura de la piscina. Tamién van mantenese abiertos los servicios de Policía del Conceyu, Rexistru Xeneral, Secretaría, Información ya Asuntos Xenerales, Servicios Sociales ya Centru d'Empresas, que nun cheganon a cerrar durante l'Estáu d'Alarma, por ser consideraos esenciales pal funcionamientu de la Casa Conceyu.

La Biblioteca vei volver al empréstamu de l.libros, que van ser sometíos a una cuarentena de 14 días en volviéndolos las personas usuarias, que, amás, nun van poder acceder a las estanterías. Permítese l'estudiu no interior de la Biblioteca con un aforu que nun supere'l 50 % ya guardando la distancia de seguridá de dous metros ente las personas usuarias. No CDTL van poder usase los ordenadores por un tiempu limitáu de 45 minutos por persona, espuéis los equipos van ser hixenizaos, amás haberá limitación d'aforu ya guardaráse la distancia de seguridá ente personas usuarias. Tanto no Serviciu de Normalización L.lingüística cumo na Oficina Moza namás s'atenderá una persona por puestu al mesmu tiempu, por ser oficinas que comparten espaciu. La Sala d'Exposiciones ya l'Auditoriu van permanecer cerraos al públicu hasta'l mes qu'entra, santamarina, momentu no que se prevé que pueda abrise una exposición nueva.  Con respectu al Archivu del Conceyu, vei poder atendese un usuariu/a de cada vez, siendo obligatoria la cita previa.

La Oficina de Turismu ya'l Muséu del Vinu ta previsto qu'abran el 25 de xunu ya van cuntar con un protocolu sanitariu propiu.

La Oficina de la Policía del Conceyu vei atender n'horariu de mañena ya tarde pa recoyida de denuncias, consultas ou cualquier trámite que requiera la presencia d'un axente. Namás van poder entrar dúas personas guardando la distancia de seguridá siempre que nun sean convivientes.  Con respectu a los servicios de Rexistru, Información ya Asuntos Xenerales, amplióuse'l serviciu d'atención de 9 a 14 horas.

 En tódolos servicios vei ser obligatorio acudir con máscara ya hixenizar las manos a la entrada cono xel previstu pa talu efectu, tamién vei tomase la temperatura, que nun vei poder ser superior a 36.9 graos. Na Casa Conceyu, las personas visitantes han acceder pola zona de Conserxería ya recomiéndase, na midida de lo posible, solicitar cita previa pa evitar esperas ya colas l.largas. Tanto no Palaciu d'Oumaña cumo no Palaciu de los Condes de Toreno vei haber espacios pa reguniones de grupos de non más de 15 personas reservándolos anantes. El personal del Conceyu cunta yá con mididas de protección: máscaras, guantes, xeles ya mamparas que-y permiten mantener la separación conas/os usuarias/os de cadagunu de los servicios.