Cangas organiza un ciclo de conferencias sobre asociacionismo - ayto-cangasdelnarcea
Actualidad juvenil
Cangas organiza un ciclu de conferencias sobre asociacionismu
El Centru de Voluntariáu del Aria II de Cruz Roja ya la Oficina d’Información a la Mocedá del Conceyu de Cangas del Narcea decidienon eichar a andar las primeras xornadas d’asociacionismu de la zona. Unas xornadas que van desenvolvese ente’l 5 ya’l 9 de los santos nel Auditoriu de la Casa la Cultura “Palaciu d’Oumaña”.
Trátase d’un ciclu de conferencias ya talleres que van correr al cargu d’asociaciones diferentes de Cangas del Narcea. Pa esta primer edición de las xornadas buscóuse mostrar las experiencias de las asociaciones del conceyu que cuntan con una traxectoria l.larga ya reconocida.
Los encargaos d’inaugurar las Xornadas d’asociacionismu del conceyu Cangas el l.lunes 5, a las 17:00, van ser el Grupo Ecologista Cangués Azor (GECA) cona ponencia “27 años de l’asociación GECA”.
El martes 6, vei desenvolvese’l taller “Estratexas pa la busca de financiación n’asociaciones”, que vei impartir el Conseyu de la Mocedá del Principáu d’Asturias, el taller escomencipiará a las 17 ya durará cuatro horas.
El miércoles 7 el turnu yá pa una de las asociaciones veteranas de Cangas del Narcea, el Tous pa tous, sociedá canguesa d’amantes del país, que falará de “El nuevu Tous pa Tous” nuna conferencia qu’empicipia a las 19:30.
El piel.le de las xornadas vei faese’l vienres a la tarde cono desenvolvimientu de las dúas conferencias últimas. La primera d’el.las, a las 19:00, vei correr a cargu de l’Asociación Micolóxica Senderuela ya la siguiente, a las 20:00, vei corresponder al Grupu de Montaña El Piélago: “El Piélago: 20 años caminando”, nesta ponencia intervendrán: José Manuel Rodríguez Varela, José María González Álvarez ya Marcelino Vega Uría.
Durante los días nos que se desenvuelvan las Xornadas d’asociacionismu del conceyu, la Sala d’Exposiciones de la Casa la Cultura “Palaciu d’Oumaña” vei acoyer una muestra colectiva de las asociaciones participantes no ciclu de conferencias. La exposición vei poder visitase n’horariu d’apertura de la Casa la Cultura, de 10:00 a 13:30 pola mañena ya de 16:00 a 19:30 pola tarde.
Estas primeras Xornadas d’asociacionismu del conceyu pretenden convertise nuna cita añal abierta a la participación de las asociaciones distintas, cono obxectivu’i crear un espaciu d’alcuentru, intercambiu d’experiencias ya colaboración ente las asociaciones del conceyu.