La Oficina d'Información a la Mocedá emprende un  proxectu nuevu: Infomóvil, un serviciu que pretende aveirar d'una forma rápida ya eficiente información d'interés relacionada con becas, empléu, concursos, subvenciones ou tiempu l.libre a las personas usuarias qu'asina lo demanden.
    La manera de proceder yá simple, la xente que quiera beneficiase d'esti serviciu namás tien que cubrir un boletín d'inscripción disponible na web del Conceyu Cangas autorizando a la Oficina d'Información a la Mocedá a manda-y avisos mediante l'aplicación de WhatsApp. 
    Dende la oficina, explican qu'esti canal yá únicamente pa recibir información; p'apurrir el propiu boletín d'inscripción ou faer consultas, las personas usuarias han dirixise a la oficina valiéndose de los canales avezaos, presencialmente ou por teléfonu, redes, corréu electrónicu...
    
    Sergio Boto, conceyal responsable del Aria de Mocedá, afirma qu'esti tipu d'iniciativas redundan nuna bona meyora no trabayu diariu del serviciu, dao qu'ofrecen un canal directu de comunicación cona ciudadanía, que posibilita l'accesu d'esta a todu tipu d'informaciones relacionadas cono sou perfil d'interés, yá dicir, non solo-y facilita l'accesu a la información, sinón que-y permite discriminar los conteníos en función de  las súas preferencias.