Cangas del Narcea, 13 d'outubre de 2020. El Grupu de Participación  Infantil ya Adolescencia de Cangas mantouvo güei pola tarde un alcuentru cono alcalde de Cangas, José Víctor Rodríguez; la directora xeneral de Mocedá, L.libertá Sexual ya Drechos LGTBI del Principáu d'Asturias, Clara Sierra; ya'l conceyal de Cultura, José María Álvarez. Durante la regunión presentánon-ys a los trés el proxectu "Xuntxs pol cambiu", que pretende convertir Cangas no primer conceyu l.libre de plásticos. Las rapacinas ya rapacinos quieren que s'instalen más papeleras de reciclaxe, amás de contenedores en tódolos pueblos, cono obxectivu de que tódolos plásticos puedan ser reutilizaos. 

"Sería muito bono que tódalas/os vecinas/os tuvieran tan concienciadas/os cono reciclaxe cumo vós", dixo'l rexidor, que se mostróu mui satisfechu con esti proxectu. Rodríguez explicóu a las rapacinas ya rapacinos que'l sou equipu de gobiernu siempre fomentóu'l reciclaxe, colocando contenedores nos nuclios más poblaos, pa chegar no futuru a los pueblos con menos población.  

Esti proxectu mediuambiental pretende ser presentáu a la ciudadanía no mes muertu, cuando se prevé que se desenvolverán las Xornadas de la Mocedá en Cangas. Nel.las, el Grupu de Participación Infantil ya Adolescencia vei tener un papel mui importante, las personas que forman parte d'esti grupu van participar en ponencias ya dar a conecer los logos, las chapas ya'l cartel que tán fadiendo sobre "Xuntxs pol cambiu".  

Las rapacinas ya los rapacinos aprovechanon la presencia de los dirixentes políticos pa reclamar más seguridá vial en dalgunos puntos concretos, ou sería necesaria la instalación de dalgún espeyu pa meyorar la visibilidá de los vehículos. Tamién pidienon la renovación del parque infantil d'El Mineru, con un proxectu yá presentáu al LEADER, pa que se financien con fondos europeos los 69 923,48 euros de los arreglos.