Cangas del Narcea, 10 de santamarina de 2020. L'alcalde de Cangas del Narcea, José Víctor Rodríguez, visitóu güei pola mañena a las personas participantes nas XVII Colonias Urbanas "Esparcer", que tolos años se celebran na vil.la canguesa no branu. El rexidor saludóu a los 43 nenos ya nenas que participanon nesta primer quincena de santamarina ya quixo felicitar a los cinco monitores pol gran trabayu feitu enguano. 

Pesie a la crisis sanitaria, las colonias pudienon celebrase "adaptándose a las circunstancias ya cumpliendo cona normativa sanitaria en vigor", recalcóu Rodríguez, qu'explicóu que las mozas ya mozos que participan nas colonias divídense en cinco grupos que nun tienen contactu ente sí. Amás, cúmplese un protocolu estrictu, guardando las distancias, tomando la temperatura ya usando xel hidroalcohólicu ya máscaras que se renuevan tolos días. "Cumpliénonse las expectativas de participación, namás nos quedóu una plaza l.libre", en total participan 43 guilopos ya guilopas, una d'el.las en siel.la de ruedas ya acompañada por una voluntaria, que, sumada a las cinco personas contratadas cumo monitoras, forman un total de 49 personas, en cumplimientu cono límite establecíu pol Ministeriu de Sanidá. Estas colonias "permiten conciliar la vida laboral ya familiar, de tala manera que durante la mañena los nenos ya las nenas tienen una actividá que faer cada día", apuntóu Rodríguez. 

Los rapacinos pudienon faer durante estos días actividades, xuegos adaptaos a la realidá nueva cumo "Hundir la flota", que se convertíu en "Hundir la COVID", todo esto amás con material recicláu. Amás, conecienon xuegos tradicionales cumo los bolos, visionanon una película no Teatru Toreno ya fixenon manualidades, chegando a crear una mochila personalizada. Las actividades fonon deseñadas pol equipu de monitores/as en coordinación cono responsable de Prevención de Riesgos del Conceyu Cangas, pa garantizar que cumplieran las normas imperantes na normalidá nueva. 

Espuéis de la visita del alcalde, los mozos salienon en grupos pal barriu de San Tisu, ou fixenon el Paséu del Vinu, una ruta de 3 km a la vera'l ríu Naviegu. La primer parte d'estas colonias acaba'l martes qu'entra, pa la segunda, sigue abierta la inscripción pa participar nas colonias que van celebrase na primer quincena d'agostu, a las que ya hai 18 nenos inscritos.