Ente'l 27 de los santos ya'l 1 del mes muertu, Cangas celebra la edición VI de las súas Xornadas d'Asociacionismu.

 Esta cita añal col asociacionismu organízase dende la Oficina Moza de Cangas del Narcea en colaboración con Cruz Roja ya parte d'un obxectivu claru: reforzar el papel de las asociaciones cumo axentes dinamizadores. Amás, plantéase, cumo una ventana al sou trabayu desinteresáu, a la súa aportación a la meyora de la vida social mediante la organización d'eventos con incidencia directa en Cangas ou, simplemente, mediante'l sou compromisu cona meyora del mediu ou las condiciones de vida de la comunidá.

La actividá que desenvuelven abarca temas mui diferientes ya tresversales, que van dende'l mediu ambiente hasta'l deporte, pasando pola visibilización de las muyeres. La sumana ábrese con un taller que tien por obxectivu informar ya asesorar a las asociaciones sobre l'usu de l'alministración electrónica, dao que dende la entrada en vigor de la Lei 39/2015, de 1 d'outubre, las asociaciones tán obligadas a comunicase cona alministración electrónicamente.

El martes 28 ya'l miércoles 29 son los días destinaos a dar voz a las protagonistas de la sumana, las asociaciones. El primeiru de los días dedicaráse un programa en  Radiu Narcea a las asociaciones profesionales ya'l segundu día, no mesmu mediu, fairáse lo propio conas asociaciones rurales, motores de desenvolvimientu del mediu nel que s'asitian, darán a conocer los sous proxectos particulares nesta cita segunda  los movimientos asociativos de Xedré ya Mual.

El xueves focalizaráse'l conteníu nas muyeres, mediante una charla sobre violencia de xéneru nel Auditoriu de la Casa la Cultura "Palaciu d'Oumaña" a cargu de María José Fernández, abogada del Centru Asesor de la Muyer del Conceyu Cangas.

Amás d'estas actividades variadas ya atractivas, las personas interesadas podrán visitar la exposición "Makazi" (personas refuxadas en l.lingua suahili) ente'l 29 de los santos ya'l 1 del mes muertu no local de Cruz Roja de Cangas del Narcea.

El conceyal de Mocedá, Sergio Boto, agradez la presencia d'un texíu asociativu tan grande en Cangas ya valora'l sou papel decisivu na visibilización del potencial de la zona.