Ente'l 26 de los santos ya'l 3 del mes muertu de 2018 van celebrase en Cangas las VII Xornadas d'Asociacionismu ya Participación. Estas xornadas añales son frutu de la colaboración ente la Oficina Moza del Conceyu Cangas ya'l Centru de Voluntariáu ya Participación Social del Aria II.

Las xornadas d'esti añu tienen dous intereses claros. El primeiru d'esos intereses yá formar a las asociaciones en materia de tramitación electrónica, dao que, cona entrada en vigor de la Lei 39/2015, de 1 d'outubre, las asociaciones tán obligadas a relacionase cona Alministración al traviés de los medios electrónicos ya, amás, dase la circunstancia añedida de que'l Conceyu Cangas acaba publicar no BOPA  la convocatoria de subvenciones destinadas a apoyar proxectos ya actividades de tipu deportivu ou cultural no conceyu. El plazu de presentación de las subvenciones deportivas acaba'l 28 de los santos ya'l de las culturales, el 5 del mes muertu. El segundu de los intereses mencionaos yá visibilizar las aportaciones de las muyeres cumo activos dinamizadores del mediu rural.

Los dous primeiros días de las xornadas van dedicase a la tramitación electrónica, sobre la que s'ofrez una formación xeneral el l.lunes 26 ya una orientada a la convocatoria añal de subvenciones destinadas a proxectos deportivos ya culturales el martes 27. Estas formaciones correrán a cargu d'unu de los responsables del CDTL del Conceyu Cangas, Dionisio Morodo.

A partir d'esti momentu, el públicu femenín conviértese en protagonista del Carrusel d'Asociaciones, un programa de radio ya televisión configuráu cumo una mesa abierta onde las representantes d'asociaciones diferientes de muyeres poderán cuntanos qué, cúmo ya por quéi. El programa emitiráse en directo a partir de las 18:00 horas ya nél participarán asociaciones diferientes de muyeres, l'axente d'Igualdá d'Oportunidades, Belén Fernández, ya las propias responsables de la organización de las xornadas, Rosa Caballero ya Carlota Fernández, que fairán las veces de moderadoras.

P'acabar las xornadas, celebraránse varias actividades nel IES cona mocedá cumo protagonista. El 30 de los santos, coincidiendo cona conmemoración del Día Internacional contra'l SIDA'l día 1 del mes muertu, repartiráse material informativu ya de prevención no centru educativu. Outramiente, el l.lunes 3 organizaráse Déjate llevar,  un teatru foru a cargu de La Candela Teatro y Comunidad. Esti teatru foru ta reconocíu pola súa metodoloxía innovadora pa la prevención de la violencia de xéneru na adolescencia.

En resume, una programación variada, eficaz ya qu'atiende a rangos d'edá, inquietudes ya necesidades diferientes d'una comunidá heteroxénea.

El conceyal de Mocedá, Sergio Boto, anima a la población a participar nas xornadas ya aprovechar esta oportunidá pa intercambiar conocimientos ya dudas ente responsables del texíu asociativu, tan importante a la hora de dinamizar socialmente esta comunidá, mayoritariamente rural ya disgregada; amás, felicita a las asociaciones pol sou esfuerzu manteníu no tiempu ya recalca'l valor de las aportaciones decisivas de las muyeres ya la importancia de tresmitir a la mocedá unos valores fundamentales de respetu, empatía ya solidaridá cumo motores de cambiu.