Ente'l 11 ya'l 15 de los santos van celebrase en Cangas las VIII Xornadas d'Asociacionismu ya Participación. Estas xornadas añales son frutu de la colaboración ente la Oficina Moza del Conceyu Cangas ya'l Centru de Voluntariáu ya Participación Social del Aria II.

 

Las xornadas d'esti añu tienen, cumo siempre, dous intereses claros, la divulgación ya la formación. En base al primeiru d'esos intereses, pretenden visibilizar las aportaciones importantísimas de las personas que se dedican a la protección del mediu ambiente. En relación al segundo, formar a las asociaciones nuna materia mui actual, la protección de datos ya la lei de tresparencia.

 

El primeiru de los días, celebraráse'l yá tradicional Carrusel d'Asociaciones, que, nesti casu, dará voz a las asociaciones que trabayan pola defensa del mediu, más concretamente: GECA, AC "La Escuelina Rural", Peña femenina "La Polvorilla", GM "Piélago" ya Sociedad de Pescadores Fuentes del Narcea.

 

Inauguradas las xornadas conas intervenciones de las asociaciones mencionadas, recairá'l protagonismu no relevu xeneracional necesariu pa la causa protagonista, nesti sentíu, disfrutaremos de las aportaciones valiosísimas de la Greta Thunberg canguesa, Selene, que nos ofrecerá la conferencia "En nuestras manos"; pa, a continuación, pasar el testigu a un personaxe más mediáticu, Leonardo DiCaprio, conductor del documental de National Geographic Channel Antes de que sea tarde.

 

El miércoles, José Manuel Fernández Mirás, abogáu especialista en drechu aplicáu a las tecnoloxías nuevas ya la protección de datos, ofrecerá formación nesta materia a las asociaciones participantes. Esta intervención yía posible gracias a la colaboración desinteresada del Conseyu de la Mocedá del Principáu d'Asturies. 

Al outur día, el xueves 14 de los santos, la compañía teatral La Sonrisa del Lagarto representará la obra Basurilla nel IES de Cangas del Narcea, apurriendo ideas interesantes ya necesarias sobre la xestión de residuos.

P'acabar unas xornadas más que pertinentes sobre l.luita contra'l cambiu climáticu ya responsabilidá ecolóxica, Belén Liste, xerente del GDR Altu Narcea-Muniel.los, presentará'l proxectu "Patrulla basuraleza, agentes especiales para el cuidado de tu pueblo y entorno" en compañía de los sous protagonistas. N'acabando la charla, entregaráse un premiu a la persona ganadora del I Concursu n'Instagram #pontenelmedionarcea. El plazu pa presentase a esti concursu acaba'l día antias de la entrega, el 14 de los santos. 

 

Acompañando estos actos, durante tola sumana, poderá visitase na Sala d'Exposiciones de la Casa la Cultura "Palaciu d'Oumaña" una exposición fotográfica colectiva con trabayos de GECA, AC "La Escuelina Rural", Peña femenina "La Polovorilla", GM "Piélago" ya Sociedad de Pescadores Fuentes del Narcea. 

 

Dende la Oficina Moza ya'l Centru de Voluntariáu ya Participación Social animan a asistir  ya participar nestas xornadas tanto al movimientu asociativu cumo a la ciudadanía en xeneral, dao que tódalas personas tenemos algo qu'aportar nuna cuestión tan trescendental ya determinante cumo'l cambiu climáticu.