Bisuyu touvo una nómina de ferreiros bien importante. L'actividá de los mazos remóntase sigún la tradición oral a la época romana, pola necesidá de ferramienta pa las explotaciones auríferas de la zona.
Dende'l sieglu XVIII la dedicación de los habitantes de Bisuyu a la ferreiría suponía l'actividá industrial única del territoriu. Con todo, nun era un trabayu exclusivu, combinábase cona ganadería ya l'agricultura.  
Bisuyu chegóu a tener cuatro mazos que funcionanon hasta mediaos del sieglu pasáu. Güei namás queda unu,  EL MAZU D'ABAXU, que paróu de funcionar nos anos 60 ya fui restauráu de recién.
Nos mazos fabricábanse toda clas d'arabías de fierru: puntas, ruedas pa los carros del país, rexas ou artículos domésticos.
La visita a las súas instalaciones ya l'eichalu a andar son actividades que forman parte del recorríu guiáu que se fai en temporada alta pa conecer esti l.lugar ya la súa historia.
Bisuyu tamién ía conecíu por ser el pueblu natal d'Alejandro Rodríguez Álvarez, conecíu cumo ¿Alejandro Casona¿,  dramaturgu famosu. Alejandro Casona nacíu en 1903 ya vivíu los primeiros anos nesti pueblu pequenu ou los padres yeran maestros d'escuela. La escuela taba asitiada na casa antigua de los Chanu Flórez ¿La Casona¿, de la qu'Alejandro tomaría'l nome pol que se lu conecería. En palabras del escritor, Bisuyu era'l paraísu: ¿You creo qu'alcontréi'l paraísu nos mious propios val.les¿. Dalgunas de las obras maestras d'esti autor son: La dama del Alba, Flor de leyendas, La sirena varada, La casa de los siete balcones...
La iglesia de San Martín, asitiada no centru'l pueblu, guarda al patrón de los ferreitos. Amás, existen no sitiu outras dúas capillas: la capilla de Las Veigas, asitiada na parte baxa del pueblu, ya la capilla de la Madalena, nuna zona d'accesu difícil dende'l que se ven panorámicas magníficas.
La existencia d'una comunidá protestante no pueblu determinóu la variedá de relixón nesti pueblín. Ta considerada cumo una de las primeras existentes n'Asturias. El sou orixe atribúise a los viaxes que los ferreiros fadían pa vender los sous productos.
Destaca tamién el conxuntu d'horrios ya paneras, dalguna d'el.las trabayadas pol vascu Gabril de Yriarte, que fadía las tallas más orixinales. Bisuyu cunta con 7 horrios ya 18 paneras, ocho d'el.las decoradas con motivos tallaos.

• Dende Bisuyu arranca la ruta de senderismu  PR.AS-168 Ruta El Pumar.
• L.lugar: Bisuyu (Cangas del Narcea)
• Distancia cona capital del conceyu: 17 km
• Visitas Guiadas
• Más información: Centru de Recepción de Visitantes - 722 62 17 08