Brañas d’Arriba yera la capital del conceyu antiguu d'El Puertu (Brañas/Leitariegos) que comprendía amás los l.lugares de Brañas/Leitariegos, Brañas d’Abaxu, Cabuezos, Trescastru ya La Farruquita. Gozóu d'autonomía ente 1821 ya 1921, añu no qu'esti conceyu s'anexionóu a Cangas del Narcea (entós Cangas de Tinéu). Antias, los mesmos l.lugares consituían el chamáu Coutu de Brañas/Leitariegos, que gozóu de prebendas riales en virtú de l'ayuda prestada a los caminantes, mercaderes ya pelegrinos perdíos a causa de las nevadas fortísimas ya'l nublu tupíu a los que s'orientaba cono repicar de las campanas. Tamién se-ys prestaba asistencia ya se-ys facilitaban los accesos nos caminos del puertu. Las prebendas, consistentes na exención del pagu d'impuestos ya de las levas del exércitu, nacienon cona ayuda prestada a la reina Urraca en plena Edá Media ya mantuviénonse ente 1326 ya 1876, siendo Alfonso XI el monarca que los instituíu.

Este pueblu pequenu asítiase a una altitú de 1.370 m ya cunta con un caseríu construíu mayoritariamente en pizarra. La súa ilesia actual tien anexu un cementeriu diminutu (sigún los vecinos el más pequenu d'Asturias).

Destacable yá tamién pola súa riqueza natural ya la súa panorámica guapa con El Cuetu d'Arbas (2007 m) de fondu. El sou territoriu ta integráu na Reserva Natural Parcial d'El Cuetu d'Arbas.
 

• L.lugar: Brañas d’Arriba
• Distancia con capital conceyu: 31 km