Estas en:

Embutíos

La vida nos pueblos ya aldeas de la zona ta mui marcada polos rituales diferentes ou costumes tradicionales, ente las que destaca'l samartín ou matanza del gochu qu'inda güei sigue presente. Estas costumes contribuyenon a que tódolos productos procedentes del gochu ya, n'especial, los embutíos sigan mui arraigaos na gastronomía canguesa.

A naide se-y escapa'l protagonismu del chorizu ya la morcía, aparentemente simples ya de tódolos días, pero indispensables nel faer platos cumo la fabada ou'l pote berzas. En Cangas del Narcea tamién se fai la l.linguaniza, outra variedá de chorizu, ya l'andoya ou andocha, que se fai a base de carne del l.lombu del gochu en tripa ancha ya que se consume cuando yá ta bien curada.

Outros embutíos más peculiares d'esta comarca son el choscu ya'l butiel.lu.

El choscu foi reconocíu de recién cona Indicación Xeográfica Protexida Choscu de Tinéu, de la que tamién forma parte'l conceyu de Cangas del Narcea, ente outros. Faise con carne de la cabecera del l.lombu ya l.lingua, todo el.lo adobáu con sal, pimentón ya ayu, embutíu no ciegu del gochu, afumáu ya curáu. Presenta un color encarnáu característicu, forma redondeada ya pesu variable ente 500 ya 2.000 gr. Comercialízase en piezas enteras, crudu ou cocíu. Anque puede consumise crudu (en curando), lo normal yá cocelu ya acompañalu de patacas cocidas.

El butiel.lu yá un embutíu primu del butiel.lu l.lionés. Faise cona parte del güesu que queda espuéis de sacar las tiras del l.lombu pa las andoyas/andochas, rabu, dalguna costía ya trozos de carne. Adóbase ya embútese na tripa más ancha ya fuerte ya cúrase. El sou aspectu exterior presenta unos salientes picudos que perfilan los güesos. Consúmese cocíu, xeneralmente acompañáu por cachos (patacas cocidas) ou por verduras.

Fábrica de embutíos, chacinera

Embutíos Santulaya:

Embutíos del Río

  • Teléfonu: 646 96 47 11
  • email: info@embutidosdelrio.es
  • web: www.embutidosdelrio.es
  • Facebook:  @delriorestauranteyembutidos
  • Instagram: @delrioembutidos