El clima ya la xeografía d'estas tierras determinanon el modelu d'alimentación que, en xeneral, caracterízase por ser mui rica en calorías ya tar basada en productos derivaos de la explotación agrícola: patacas, l.leite, centén, maíz, fabas ya castañas. Una rica gastronomía basada en materias primas de calidá excelente.

L'aislamientu xeográficu contribuíu, amás, a mantener costumes culinarias ancestrales, cumo'l ritual de la matanza del gochu, del que se saca'l mondongu ya las salazones, ente las que destaca'l butiel.lu ou'l choscu. El platu más típicu yá'l potaxe ou caldu de berzas, que se prepara con berzas, patacas, fabas pintas ya carne: chorizu, toucín, pernil ya morcía. Todo el.lo tien de cocer espacín ya no fogón. Una vez feitu'l pote, sepárase del caldu'l compangu, que constitúi'l segundu platu.

Outra de las materias primas por excelencia yá la xata roxa, que nos da una carne exquisita de la raza autóctona d'Asturiana de los Val.les. Mantiénse'l sistema antiguu de conservar la carne en salao, sacándose productos cumo la cecina. Tamién tien fama la caza, sabiamente preparada a base de xabaril, corzu ya perdiz.

Las empanadas ya'l el pan artesanu de l.leña completan el sabor de la nuesa gastronomía. Tradicionalmente, amasábase en tódalas casas pa consumu diariu. Esi mesmu día fadíase'l bol.lu, una fogaza preñada con chorizu ya toucín. Cona masa del pan que sobraba, avezaban faese unas tortas fritas, las rapas.

Los postres son el colofón d'esta bona comida. Consistían principalmente en papas d'arroz, requeisón con miel ya feisuelos, que se fadían n'espiral. El frutu del monte ta mui presente tanto na gastronomía de la comarca, cumo nas súas costumes. Nueces, ablanas ou castañas n'outuenu; zreizas, arándanos ya mouras pol branu. El queisu de Xinestosu, d'aspectu peculiar debíu al molde d'espartu que s'usaba, tien fama reconocida. Güei la súa producción yá ruina ya de consumu familiar.

Mención aparte mere'l vinu, acoyíu a la Indicación Xeográfica Protexida cona denominación de vinu de calidá de Cangas ya yá un elementu diferenciador por ser la única zona asturiana productora de vinos. El sou despegue empicipia no sieglu XII cona entrada de los benedictinos al Monesteriu de Courias ya chega a los nuesos días cumo un caldu mozu, l.lixeiru ya apreciáu pol gustu. Feitu con variedades de vide autóctona, consigue un aroma afrutáu que representa'l complementu ideal pa la gastronomía de la zona. Nas bodegas tradicionales inda agora se degusta'l vinu no cachu, concu de madera que vei pasando de mano en mano.